രാജ്‌കോട്ട്: വ്യാഴാഴ്ച ബംഗ്ലാദേശിനെതിരായ ടി20 മത്സരത്തില്‍ വെടിക്കെട്ട് ബാറ്റിങ് കൊണ്ട് രാജ്‌കോട്ടിലെ ആരാധകരെ കൈയിലെടുത്ത രോഹിത് ശര്‍മ ക്രീസ് വിട്ടത് ഒരുപിടി റെക്കോര്‍ഡുകളോടെ.
നായകന്റെ ചിറകിലേറി നിര്‍ണായകമായ രണ്ടാം മത്സരം ഇന്ത്യ മികച്ച ജയം സ്വന്തമാക്കുകയും ചെയ്തു.
43 പന്തില്‍ 85 റണ്‍സുമായി കളിയിലെതാരം പട്ടവും രോഹിത് സ്വന്തം പേരിലാക്കി. ടി20 ക്രിക്കറ്റില്‍ 2500 റണ്‍സ് തികയ്ക്കുന്ന ആദ്യ താരമെന്ന റെക്കോര്‍ഡ് കുറിച്ചതിനു പുറമേ, ഒരു കലണ്ടര്‍ വര്‍ഷത്തില്‍ ഏറ്റവും കൂടുതല്‍ സിക്‌സറുകള്‍ നേടുന്ന താരമെന്ന നേട്ടവും കൈക്കലാക്കി.
മുന്‍പ് ഒരു കലണ്ടര്‍ വര്‍ഷത്തില്‍ 34 സിക്‌സറുകള്‍ നേടിയ മുന്‍ ഇന്ത്യന്‍ നായകന്‍ ധോണിയുടെ പേരിലായിരുന്നു ഇക്കാര്യത്തിലെ റെക്കോര്‍ഡ്.
ഇന്നലെ ആറ് സിക്‌സറുകള്‍ പറത്തിയതോടെ രോഹിത് ഈ റെക്കോര്‍ഡും തിരുത്തി. കൂടാതെ, ഈ സിക്‌സറുകളോടെ ടി20 ക്രിക്കറ്റില്‍ ബംഗ്ലാദേശിനെതിരേ ഏറ്റവും കൂടുതല്‍ സിക്‌സറുകള്‍ നേടുന്ന താരമായും രോഹിത് മാറി.
അതേസമയം, ടി20 നായകനായി ആറ് അര്‍ധ സെഞ്ചുറി കുറിച്ച വിരാട് കോഹ്‌ലിയുടെ റെക്കോര്‍ഡിനൊപ്പമെത്താനും ഹിറ്റ്മാന് കഴിഞ്ഞു.