റിയാദ്: സഊദി തലസ്ഥാനമായ റിയാദില്‍ പാലക്കാട് സ്വദേശിയെ വാഹനത്തില്‍ മരിച്ച നിലയില്‍ കണ്ടെത്തി. ഇവിടെ ഷിഫാ സനാഇയ്യയില്‍ ജോലി ചെയ്തിരുന്ന പാലക്കാട് നെന്മാറ കയറാടി വഴിയിലിയില്‍ ഒറ്റക്കണ്ടത്തില്‍ യൂസുഫി (40) നെയാണ് വാഹനത്തില്‍ മരിച്ച നിലയില്‍ കണ്ടെത്തിയത്. അല്‍ഖര്‍ജ് ചെക്ക് പോസ്റ്റിനു സമീപം ഇദ്ദേഹം ഓടിച്ചിരുന്ന പിക്കപ്പില്‍ മരിച്ച നിലയില്‍ കണ്ടെത്തിയതയായി ട്രാഫിക് പൊലിസ് സ്‌പോണ്‍സറെ വിവരം അറിയിക്കുകയായിരുന്നു. ചെക് പോസ്റ്റിനു ശേഷം ഒരു കിലോമീറ്റര്‍ ദൂര പരിധിയിലാണ് പിക്കപ്പ് കണ്ടെത്തിയത്. ഹൃദയാഘാതമാണ് മരണകാരണമെന്നാണ് നിഗമനം.

സൗജത്ത് ആണ് ഭാര്യ. അഫ്‌സ, അഹ്‌ല, മുഹമ്മദ് അഫ്‌നാന്‍ എന്നിവര്‍ മക്കളാണ്. ഖദീജയാണ് മാതാവ്. നേരത്തെ ഖസീമില്‍ ജോലി ചെയ്തിരുന്ന ഇദ്ദേഹം അഞ്ചു വര്‍ഷമായി റിയാദില്‍ ജോലി ചെയ്തു വരികയായിരുന്നു. റിയാദ് ശുമേസി ആശുപത്രിയില്‍ സൂക്ഷിച്ചിരിക്കുന്ന മൃതദേഹം ഇവിടെ ഖബറടക്കുന്നതിനുള്ള നടപടികള്‍ തുടരുകയാണ്.