വാണിമേല്‍: ഗുജറാത്തില്‍ ഉണ്ടായ വാഹനാപകടത്തില്‍ വാണിമേല്‍ സ്വദേശിയായ വിദ്യാര്‍ഥി മരിച്ചു. വാണിമേല്‍ സി.സി മുക്കിലെ തട്ടാന്റവിടെ അബ്ദുള്‍ കലാം(23) ആണ് മരിച്ചത്.

അബ്ദുള്‍ കലാം സഞ്ചരിച്ച ബൈക്കാണ് അപകടത്തില്‍ പെട്ടത്. ഗുജറാത്തിലെ കൈവല്യ എഡുക്യേഷന്‍ ഫൗണ്ടേഷന്റെ ഉടമസ്ഥതയിലുളള ബൈക്കിലാണ് അബ്ദുള്‍ കലാം സഞ്ചരിച്ചിരുന്നത്. തലയ്ക്ക് ഗുരുതരമായി പരുക്കേറ്റ അബ്ദുള്‍ കലാം സംഭവ സ്ഥലത്ത് തന്നെ മരിച്ചതായി നാട്ടുകാര്‍ക്ക് വിവരം ലഭിച്ചു.

പോണ്ടിച്ചേരി യൂനിവേഴ്‌സിറ്റിയില്‍ നിന്ന് കഴിഞ്ഞ വര്‍ഷം എം കോം പൂര്‍ത്തിയാക്കിയതിന് ശേഷം കൈവല്യ എഡ്യുക്കേഷന്‍ ഫൗണ്ടേഷന്റെ കീഴില്‍ ഗുജറാത്തിലെ സൂറത്തില്‍ ഗാന്ധിയന്‍ ഫെലോഷിപ്പ് ലഭിച്ച് പരിശീലനത്തിലായിരുന്നു.

പിതാവ് തട്ടാന്റവിട അബ്ദുല്ല ഹാജി. മാതാവ് മൈമൂന, സഹോദരങ്ങള്‍: നൗഷാദ്, പരേതനായ ഇഖ്ബാല്‍.