തിരുവനന്തപുരം: കൂടുതല്‍ ആശുപത്രികളും ഡിസ്‌പെന്‍സറികളും ആരംഭിക്കുന്നതിന് ഇ.എസ്.ഐ കോര്‍പറേഷനെ സമീപിക്കുമെന്ന് മന്ത്രി ടി.പി രാമകൃഷ്ണന്‍ നിയമസഭയെ അറിയിച്ചു.
നിലവിലെ ഇ.എസ്.ഐ ആശുപത്രികളുടെ നവീകരണം സ്റ്റേറ്റ് മെഡിക്കല്‍ സര്‍വിസ് വകുപ്പിന് മാത്രം ചെയ്യാനാവുന്നതല്ല. അതിന് ഇ.എസ്.ഐ കോര്‍പറേഷന്റെ കൂടി അനുമതിയും സഹകരണവും വേണം. മുക്കം, കട്ടപ്പന എന്നിവിടങ്ങളില്‍ ഇതിനോടകം ഡിസ്‌പെന്‍സറികള്‍ ആരംഭിച്ചു. സുല്‍ത്താന്‍ ബത്തേരി, കല്‍പ്പറ്റ, കണ്ണന്‍ദേവന്‍ ഹില്‍സ്, അടിമാലി എന്നിവിടങ്ങളില്‍ ഉടന്‍ ആരംഭിക്കും. ആലത്തൂര്‍, ബാലുശേരി, താമരശേരി, കൂത്താട്ടുകുളം, കുമളി, വെഞ്ഞാറമൂട്, കുളത്തൂപ്പുഴ തുടങ്ങി 12 ഡിസ്‌പെന്‍സറികള്‍ക്ക് അനുമതി ലഭിച്ചിട്ടില്ല.
കേരളത്തില്‍ മുഴുവന്‍ തൊഴിലാളികളെയും ഇ.എസ്.ഐ പദ്ധതിയില്‍ ഉള്‍പ്പെടുത്തണമെന്നാണ് സര്‍ക്കാര്‍ നിലപാട്. എന്നാല്‍ 21,000 രൂപ എന്ന ശമ്പള പരിധി നിലനല്‍ക്കുന്നതിനാല്‍ എല്ലാവരെയും ഉള്‍പ്പെടുത്താനാവില്ല. ശമ്പളപരിധി ഭേദഗതി ചെയ്യുന്നതിന് കോര്‍പറേഷനുമായി ബന്ധപ്പെട്ട് തുടര്‍ നടപടി സ്വീകരിക്കുമെന്നും മന്ത്രി പറഞ്ഞു.
കൂടാതെ ഇ.എസ്.ഐയില്‍ എം പാനല്‍ ചെയ്ത സ്വകാര്യ ആശുപത്രികളികളില്‍ എല്ലാ സപെഷ്യാലിറ്റി ചികിത്സയും തൊഴിലാളികള്‍ക്ക് ലഭ്യമാക്കുന്നതിന് ഇടപെടുമെന്നും മറ്റൊരു ചോദ്യത്തിന് മന്ത്രി മറുപടി പറഞ്ഞു.