കൊല്ലം: താലൂക്കിലെ മുണ്ടയ്ക്കല്‍ വില്ലേജില്‍ ക്വയിലോണ്‍ ഓപ്പണ്‍ സ്‌കൗട്ട് ഗ്രൂപ്പിന്റെ പേരില്‍ പതിച്ചു നല്‍കിയിരുന്ന 46 സെന്റ് സ്ഥലം പട്ടയം റദ്ദുചെയ്ത് സര്‍ക്കാര്‍ ഏറ്റെടുത്തു. ജില്ലാ കലക്ടര്‍ ഡോ. മിത്രയുടെ നേതൃത്വത്തിലാണ് ഇന്നലെ ഏറ്റെടുക്കല്‍ നടപടികള്‍ പൂര്‍ത്തിയാക്കിയത്.
നിബന്ധനകള്‍ക്ക് വിധേയമായി പതിച്ചു നല്‍കിയ സ്ഥലം ദീര്‍ഘനാളായി സ്‌കൗട്ട് പ്രവര്‍ത്തനങ്ങള്‍ക്ക് ഉപയോഗിക്കുന്നില്ലെന്നും ദുരുപയോഗം ചെയ്യുകയാണെന്നും ഫെബ്രുവരിയില്‍ കലക്ടര്‍ സര്‍ക്കാരിന് റിപ്പോര്‍ട്ട് നല്‍കിയിരുന്നു. ഇതേത്തുടര്‍ന്ന് ക്വയിലോണ്‍ ഓപ്പണ്‍ സ്‌കൗട്ട് ഗ്രൂപ്പിന്റെ പേരില്‍ നല്‍കിയ പട്ടയം റദ്ദാക്കി സ്ഥലം സര്‍ക്കാര്‍ ഉടമസ്ഥതിയിലാക്കുന്നതിന് ജില്ലാ കലക്ടറെ ചുമതലപ്പെടുത്തി സര്‍ക്കാര്‍ ഉത്തരവായിരുന്നു.
സബ് കലക്ടര്‍ ഡോ. എസ് ചിത്ര, എ.ഡി.എം ഐ. അബ്ദുല്‍സലാം തഹസില്‍ദാര്‍ സാജിത ബീഗം, അഡീഷണല്‍ തഹസില്‍ദാര്‍ ജോണ്‍സണ്‍, മുണ്ടയ്ക്കല്‍ വില്ലേജ് ഓഫീസര്‍ എസ്. സജീവ് എന്നിവരും കലക്ടര്‍ക്കൊപ്പമുണ്ടായിരുന്നു.