കൊല്ലം: ചെന്നൈ ഐ.ഐ.ടി വിദ്യാര്‍ഥിനി ഫാത്തിമാ ലത്തീഫ് ദുരൂഹ സാഹചര്യത്തില്‍ തൂങ്ങിമരിച്ച നിലയില്‍ കാണപ്പെട്ട സംഭവത്തില്‍ സമഗ്രമായ അന്വേഷണം ആവശ്യപ്പെട്ട് ഫാത്തിമയുടെ മാതാപിതാക്കള്‍ തമിഴ്‌നാട് മുഖ്യമന്ത്രിയെയും ഡി.ജി.പിയെയും നേരില്‍ക്കണ്ട് പരാതി നല്‍കും. മുഖ്യമന്ത്രിയെ കാണാനുള്ള അനുവാദം കുടുംബത്തിനു ലഭിച്ചിട്ടുണ്ട്. ഇതിനുള്ള തിയതി കുടുംബത്തെ അറിയിക്കാമെന്നാണ് തമിഴ്‌നാട് സര്‍ക്കാരുമായി ബന്ധപ്പെട്ട വൃത്തങ്ങള്‍ പറഞ്ഞിട്ടുണ്ട്. തമിഴ്‌നാട്ടിലെ ഒരു എം.എല്‍.എ ഇടപെട്ടാണ് മുഖ്യമന്ത്രിയുമായുള്ള കൂടിക്കാഴ്ചക്ക് അവസരം ഒരുക്കിയത്. അതനുസരിച്ചായിരിക്കും ഫാത്തിമയുടെ കുടുംബം ചെന്നൈയില്‍ എത്തുക.
വിദ്യാര്‍ഥിനി ആത്മഹത്യ ചെയ്യാന്‍ കാരണക്കാരെന്ന് കരുതുന്ന രണ്ട് അധ്യാപകരെ പൊലിസ് കഴിഞ്ഞ ദിവസം ചോദ്യം ചെയ്തിരുന്നു. അതേസമയം ആരോപണ വിധേയനായ ഐ.ഐ.ടി അധ്യാപകന്‍ സുദര്‍ശന്‍ പത്മനാഭനെതിരേ ഫാത്തിമയുടെ സഹപാഠികളാരും മൊഴി നല്‍കിയിട്ടില്ലെന്നാണ് പൊലിസ് വ്യക്തമാക്കുന്നത്. എന്നാല്‍ പൊലിസിന്റെ അന്വേഷണത്തില്‍ തൃപ്തി ഇല്ലെന്നും കേസ് സി.ബി.ഐ അന്വേഷിക്കണമെന്നും ഒരു വിഭാഗം വിദ്യാര്‍ഥികള്‍ ആവശ്യപ്പെടുന്നുണ്ട്.
ഫാത്തിമയുടെ മൊബൈല്‍ ഫോണില്‍ നിന്ന് അധ്യാപകരായ സുദര്‍ശന്‍ പത്മനാഭന്‍,ഹേമചന്ദ്രന്‍, മിലിന്ദ് എന്നിവരുടെ മാനസിക പീഡനമാണ് ജീവനൊടുക്കാന്‍ കാരണമെന്ന ആത്മഹത്യാക്കുറിപ്പ് കണ്ടെത്തിയിരുന്നു. സംഭവത്തിന് ശേഷം സുദര്‍ശന്‍ പത്മനാഭന്‍ കാംപസില്‍ എത്തിയിട്ടില്ല. ഇയാള്‍ മിസോറാമിലേക്ക് കടന്നെന്നാണ് വിവരം. ഹേമചന്ദ്രന്‍, മിലിന്ദ് എന്നീ അധ്യാപകരെയും സഹപാഠികളെയും ഉള്‍പ്പടെ 13 പേരെ പൊലിസ് ഇതുവരെ ചോദ്യം ചെയ്തിട്ടുണ്ട്. പലപ്പോഴും ഫാത്തിമ തനിച്ചിരുന്ന് കരയാറുണ്ടെന്ന് സഹപാഠികള്‍ പൊലിസിന് മൊഴി നല്‍കിയിരുന്നു.
സുദര്‍ശന്‍ പത്മനാഭന്‍ പഠിപ്പിക്കുന്ന ലോജിക്ക് പേപ്പറിന് 20ല്‍ 13മാര്‍ക്കാണ് ഫാത്തിമയ്ക്ക് ലഭിച്ചത്. അഞ്ച് മാര്‍ക്കിന് കൂടി അര്‍ഹതയുണ്ടെന്ന് ചൂണ്ടിക്കാട്ടി ഫാത്തിമ വകുപ്പ് മേധാവിയെ സമീപിച്ചിരുന്നു. അന്ന് വൈകിട്ടോടെയാണ് ഫാത്തിമയെ ഹോസ്റ്റല്‍ മുറിയിലെ ഫാനില്‍ തൂങ്ങി മരിച്ച നിലയില്‍ കണ്ടെത്തിയത്. സംഭവ ശേഷം ഇന്റഗ്രേറ്റഡ് എം. എ വിദ്യാര്‍ഥികള്‍ക്ക് അവധി നല്‍കിയിരിക്കുകയാണ്. സെമസ്റ്റര്‍ പരീക്ഷകളും നീട്ടിവച്ചിട്ടുണ്ട്.