ആലപ്പുഴ: കാഴ്ചയില്ലാത്തവര്‍ക്കും ആത്മവിശ്വാസത്തോടെ പെട്ടെന്നു തിരിച്ചറിയാനും ഉപയോഗിക്കാനും തക്കവിധത്തില്‍ കറന്‍സി കളില്‍ ബ്രെയിലി തിരിച്ചറിയല്‍ സൂചകങ്ങള്‍ അച്ചടിക്കണമെന്നു തത്തംപള്ളി റസിഡന്റ്‌സ് അസോസിയേഷന്‍ ആവശ്യപ്പെട്ടു. നോട്ടുകളുടെ വലുപ്പവും അതിലെ തടിപ്പുള്ള അടയാളങ്ങളും മുദ്രണങ്ങളും മറ്റും തൊട്ടുനോക്കിയും അനുഭവിച്ചും മനസിലാക്കിയാണ് കാഴ്ചയില്ലാത്തവര്‍ നോട്ടുകള്‍ തിരിച്ചറിയുന്നത്. രണ്ടു വര്‍ഷം മുന്‍പ് നോട്ടുനിരോധനം നടപ്പിലാക്കിയ ശേഷം വിവിധ വലുപ്പങ്ങളിലും വര്‍ണങ്ങളിലും പുറത്തിറക്കിയ നോട്ടുകള്‍ ഉപഭോക്തൃസൗഹൃദപരമല്ല. അന്ധര്‍ക്കു ഇപ്പോഴത്തെ പുതിയ നോട്ടുകള്‍ തിരിച്ചറിയുക ബുദ്ധിമുട്ടേറിയ കാര്യമാണ്. 2011-ലെ സെന്‍സസ് അനുസരിച്ച് ഇന്ത്യയിലെ 50 ലക്ഷത്തിലേറെ ആള്‍ക്കാര്‍ക്ക് കാഴ്ചശക്തിയില്ല.
കേരളത്തില്‍ തന്നെ ഭാഗ്യക്കുറി ടിക്കറ്റ് വില്‍പനയിലൂടെ ഉപജീവനമാര്‍ഗം തേടുന്ന കാഴ്ചശക്തിയില്ലാത്ത അനേകം പേരുണ്ട്. അവരുടെ കൈകളിലേക്ക് എത്തുന്ന നോട്ടുകളുടെ വിഭാഗം തിരിച്ചറിയാന്‍ മാര്‍ഗമില്ല. വലുപ്പം തന്നെ ഒരു പ്രധാന ഘടകമാണ്. ഏറ്റവും കുറഞ്ഞ സംഖ്യയുടെ നോട്ടിന് ഏറ്റവും വലുപ്പം കുറവും വില കൂടുന്നതനുസരിച്ച് വലുപ്പം കൂടുകയും ചെയ്താല്‍ തന്നെ വളരെ ആശ്വാസമാകും.
രാജ്യത്തെ ന്യൂനപക്ഷത്തിനു വേണ്ടി സൗകര്യങ്ങള്‍ ഒരുക്കേണ്ടതില്ലെന്ന നിലപാടിലാണ് കേന്ദ്രസര്‍ക്കാറെന്നും അവര്‍ ആരോപിച്ചു.