ന്യൂഡല്‍ഹി: നഷ്ടത്തിലോടുന്ന എയര്‍ ഇന്ത്യയും മഹാരത്‌ന കമ്പനിയായ ഭാരത് പെട്രോളിയം കോര്‍പ്പറേഷനും (ബി.പി.സി.എല്‍) വില്‍ക്കാന്‍ തീരുമാനം. കേന്ദ്ര ധനകാര്യവകുപ്പ് മന്ത്രി നിര്‍മ്മല സീതാരാമന്‍ ആണ് ഇക്കാര്യം ഔദ്യോഗികമായി സ്ഥിരീകരിച്ചത്. മാര്‍ച്ച് മാസത്തോടെ രണ്ടുപൊതുമേഖല കമ്പനികളിലുമുള്ള ഭൂരിപക്ഷ ഓഹരികള്‍ വില്‍ക്കുമെന്നും സാമ്പത്തിക വര്‍ഷം അവസാനിക്കുന്നതിന് മുന്‍പ് വില്‍പ്പന നടത്താനാണ് ലക്ഷ്യമിടുന്നതെന്നും നിര്‍മല അറിയിച്ചു. നിലവിലെ സാഹചര്യങ്ങള്‍ പരിഗണിച്ചാണ് വില്‍പ്പനയെന്നും ടൈംസ് ഓഫ് ഇന്ത്യക്ക് നല്‍കിയ അഭിമുഖത്തില്‍ നിര്‍മ്മല വ്യക്തമാക്കി.

കഴിഞ്ഞ വര്‍ഷം എയര്‍ ഇന്ത്യ വില്‍ക്കാന്‍ സര്‍ക്കാര്‍ ശ്രമിച്ചിരുന്നെങ്കിലും വിപണിയില്‍ നിന്നുള്ള പ്രതികരണം മോശമായത് കൊണ്ട് നടന്നിരുന്നില്ല. ഒരു ലക്ഷം കോടി രൂപയാണ് ഈ വര്‍ഷം മാത്രം പൊതുമേഖല സ്ഥാപനങ്ങളുടെ വില്‍പ്പനയിലൂടെ സമാഹരിക്കാന്‍ സര്‍ക്കാര്‍ ലക്ഷ്യമിടുന്നത്.

വിദേശ നിക്ഷേപക സംഗമങ്ങളില്‍ എയര്‍ ഇന്ത്യയുടെ വില്‍പനയില്‍ നിക്ഷേപകര്‍ വലിയ താത്പര്യം കാണിക്കുന്നു. മുന്‍ വര്‍ഷങ്ങളില്‍ അത്ര താത്പര്യം പ്രകടിപ്പിച്ചിരുന്നില്ലെന്നും മന്ത്രി അവകാശപ്പെട്ടു. പ്രതിസന്ധി മറികടക്കാന്‍ സര്‍ക്കാര്‍ ശരിയായ സമയത്ത് ഇടപെടലുകള്‍ നടത്തിയിട്ടുണ്ട്. വ്യവസായ പ്രമുഖര്‍ക്ക് അവരുടെ ബാലന്‍സ് ഷീറ്റ് മെച്ചപ്പെടുത്താന്‍ സര്‍ക്കാര്‍ സഹായിച്ചിട്ടുണ്ട്. പലരും പുതിയ നിക്ഷേപം ആസൂത്രണം ചെയ്യുകയാണെന്നും മന്ത്രി കൂട്ടിച്ചേര്‍ത്തു.

തൊഴിലാളി യൂണിയനുകള്‍ ബി.പി.സി.എല്‍ സ്വകാര്യ മേഖലയ്ക്ക് വില്‍ക്കരുത് എന്ന് ആവശ്യപ്പെട്ട് പ്രക്ഷോഭം തുടങ്ങിയിരിക്കെയാണ് സര്‍ക്കാരിന്റെ നടപടി. വില്‍പ്പനയ്‌ക്കെതിരെ ആര്‍.എസ്.എസ്സിനുള്ളിലും അതൃപ്തിയുണ്ട്. എല്‍.പി.ജി ഉള്‍പ്പെടെയുള്ള സേവനങ്ങളുടെ 25 ശതമാനത്തോളം ബി.പി.സി.എല്‍ ആണ് നിയന്ത്രിക്കുന്നത്.

Govt to wrap up sale of Air India, BPCL by March 2020