നെടുമ്പാശ്ശേരി: തൃപ്തി ദേശായിയെയും സംഘത്തെയും നെടുമ്പാശ്ശേരി വിമാനത്താവളത്തില്‍ മണിക്കൂറുകളോളം തടഞ്ഞുവച്ച സംഭവത്തില്‍ ബി.ജെ.പി നേതാവ് കെ. സുരേന്ദ്രന്‍ അടക്കം 500 പേര്‍ക്കെതിരേ നെടുമ്പാശ്ശേരി പൊലിസ് എഫ്.ഐ.ആര്‍ രജിസ്റ്റര്‍ ചെയ്തു. 20 ബി.ജെ.പി നേതാക്കളെയാണ് പ്രതിപ്പട്ടികയില്‍ ചേര്‍ത്തിരിക്കുന്നത്. ഇതോടെ സുരേന്ദ്രന് മറ്റു കേസുകളില്‍ ജാമ്യം ലഭിച്ചാലും ഈ കേസില്‍ ജാമ്യം ലഭിക്കാതെ പുറത്തിറങ്ങാന്‍ കഴിയില്ല. ബി.ജെ.പി സംസ്ഥാന വൈസ് പ്രസിഡന്റ് എ.എന്‍ രാധാകൃഷ്ണന്‍, ജില്ലാ സെക്രട്ടറി എം.എന്‍ ഗോപി, ഹിന്ദു ഐക്യവേദി സംസ്ഥാന സെക്രട്ടറി ആര്‍.വി ബാബു, ശോഭ സുരേന്ദ്രന്‍ എന്നിവരാണ് പ്രതിപ്പട്ടികയിലെ പ്രമുഖര്‍.
ഐ.പി.സി 143, 147, 506 (1), 283, 108, 149 എന്നീ വകുപ്പുകളാണ് ഇവര്‍ക്കെതിരേ ചുമത്തിയിരിക്കുന്നത്. ആര്‍.ഡി.ഒയുടെ ഉത്തരവ് ലംഘിച്ചു, സുരക്ഷ ഉദ്യോഗസ്ഥരെ ഭീക്ഷണിപ്പെടുത്തി, ഗതാഗത തടസം സൃഷ്ടിച്ചു, നെടുമ്പാശ്ശേരി അന്താരാഷ്ട്ര വിമാനത്താവളത്തിന്റെ പ്രവര്‍ത്തനങ്ങള്‍ തടസപ്പെടുത്തി, സംഘടിക്കാന്‍ പാടില്ലാത്ത സ്ഥലങ്ങളില്‍ സംഘടിച്ച് പ്രശ്‌നം സൃഷ്ടിക്കാന്‍ ശ്രമം നടത്തി തുടങ്ങിയവയാണ് പ്രതികള്‍ക്കെതിരായ കുറ്റങ്ങള്‍. കഴിഞ്ഞ മാസം 16നാണ് സുപ്രിം കോടതി വിധിയുടെ പിന്‍ബലത്തില്‍ ശബരിമലയിലേക്കു പോകുന്നതിനായി തൃപ്തി ദേശായിയും സംഘവും നെടുമ്പാശ്ശേരി വിമാനത്താവളത്തില്‍ എത്തിയത്.
ഇവരെ വിമാനത്താവളത്തിന് പുറത്തിറങ്ങാന്‍ പോലും അനുവദിക്കാത്ത വിധത്തില്‍ അഭ്യന്തര ടെര്‍മിനലിന് പുറത്ത് നാമജപം ചൊല്ലി പ്രതിഷേധം സംഘടിപ്പിക്കുകയായിരുന്നു. പുലര്‍ച്ചെ 4.30 മുതല്‍ രാത്രി 9.30 വരെയാണ് സമരം നടന്നത്. അതീവ സുരക്ഷാ മേഖല എന്ന നിലയില്‍ വിമാനത്താവളത്തില്‍ മുദ്രാവാക്യം വിളിക്കുന്നതിനും സമരങ്ങള്‍ നടത്തുന്നതിനും വിലക്കുണ്ട്. ഇതു വകവയ്ക്കാതെയായിരുന്നു സമരം. സംഭവം വിമാനത്താവളത്തിന്റെ പ്രവര്‍ത്തനങ്ങളെ വരെ ബാധിച്ചിരുന്നു. രാജ്യത്തിന്റെ വിവിധ പ്രദേശങ്ങളില്‍ നിന്നെത്തിയ ആഭ്യന്തര യാത്രക്കാര്‍ക്കും സമരം കാരണം വളരെയേറെ പ്രയാസം നേരിട്ടിരുന്നു.