കോഴിക്കോട്: കോഴിക്കോട് പന്തീരാങ്കാവ് യുഎപിഎ കേസിൽ അലനും താഹക്കും ഒപ്പമുണ്ടായിരുന്ന ആളെ തിരിച്ചറിഞ്ഞെന്ന് പൊലിസ്.

മലപ്പുറം പാണ്ടിക്കാട് സ്വദേശിയായ ഉസ്മാനാണ് കൂടെയുണ്ടായിരുന്നതെന്നാണ് പൊലിസ് പറയുന്നത്. അലനെയും താഹയെയും അറസ്റ്റ് ചെയ്യുന്ന സമയത്ത് ഇയാൾ ഓടി രക്ഷപ്പെടുകയായിരുന്നു.

പെരിന്തൽമണ്ണ ഡിവൈഎസ്പിക്ക് കീഴിൽ ഉസ്മാനെതിരെ യുഎപിഎ കേസുണ്ടെന്നും മാവോയിസ്റ്റ് ബന്ധമുണ്ടെന്നുമാണ് പൊലിസ് പറയുന്നത്.

ഓടി രക്ഷപ്പെടുന്നതിനിടെ ഉസ്മാൻറെ ബാഗ് പൊലിസിന് ലഭിച്ചിരുന്നു. ഈ ബാഗിൽ നിന്നുമാണ് മാവോയിസ്റ്റ് ബന്ധം വ്യക്തമാക്കുന്ന പോസ്റ്ററുകളും ലഘുലേഖകളും ലഭിച്ചത്. സിസിടിവി ദൃശ്യങ്ങളടക്കം പരിശോധിച്ചാണ് ഉസ്മാനെ തിരിച്ചറിഞ്ഞത്.