ആലപ്പുഴ: മുഖം കാന്‍വാസാക്കി നിറവും ചന്തവും ചേലും ചാലിച്ചെഴുതി നെഹ്‌റു ട്രോഫി വള്ളംകളി ആഘോഷങ്ങളില്‍ പങ്കെടുത്ത് സ്വര്‍ണനാണയം സമ്മാനം നേടാന്‍ വിദ്യാര്‍ഥികള്‍ക്ക് അവസരം.
നെഹ്‌റു ട്രോഫി പബ്‌ളിസിറ്റി കമ്മിറ്റിയാണ് പ്ലസ് ടു, കോളജ് വിദ്യാര്‍ഥികള്‍ക്കായി മുഖചിത്രണംമുഖച്ചുട്ടി മത്സരം സംഘടിപ്പിക്കുന്നത്. ഓഗസ്റ്റ് അഞ്ചിന് വൈകിട്ട് നാലിന് ആലപ്പുഴ ബീച്ചിലെ വിജയ് പാര്‍ക്കിലാണ് മത്സരം നടക്കുക.
മുഖത്തിന്റെ ആകൃതിക്ക് ഇണങ്ങുംവിധം സ്വന്തമായും പരസഹായത്തോടെയും മുഖത്ത് വര്‍ണക്കൂട്ട് തീര്‍ക്കാം. മുഖത്തും കഴുത്തിലും മാത്രമേ ചിത്രണം അനുവദിക്കൂ.
മറ്റു ശരീരഭാഗങ്ങളില്‍ ചിത്രണം നടത്തിയാല്‍ അയോഗ്യരാക്കപ്പെടും. ഇണങ്ങുന്ന വേഷങ്ങള്‍ ധരിക്കാം. ആണ്‍, പെണ്‍ വിഭാഗങ്ങളിലായാണ് മത്സരം. നിറക്കൂട്ട്, ബ്രഷ് അടക്കമുള്ള സാമഗ്രികള്‍ മത്സരാര്‍ഥികള്‍ കൊണ്ടുവരണം.
ഒന്നാമതെത്തുന്നയാള്‍ക്ക് മുല്ലയ്ക്കല്‍ സംസം ജൂവലറി നല്‍കുന്ന സ്വര്‍ണനാണയം സമ്മാനമായി ലഭിക്കും. രണ്ടും മൂന്നും സ്ഥാനങ്ങളിലെത്തുന്നവര്‍ക്ക് സമ്മാനങ്ങള്‍ നല്‍കും. വിശദവിവരങ്ങള്‍ക്ക് ഫോണ്‍: 0477 2251349.