മാങ്ങാട്ടുപറമ്പ്: പോളൊടിയുമെന്ന പേടിയില്‍ സംഘാടകര്‍ മുഖം തിരിച്ചപ്പോള്‍ മെഡല്‍ പ്രതീക്ഷയുമായി പിറ്റിലെത്തിയ താരത്തിന് കണ്ണീരോടെ മടക്കം. സീനിയര്‍ ആണ്‍കുട്ടികളുടെ പോള്‍വാള്‍ട്ടില്‍ മത്സരിക്കാനെത്തിയ നിബിന്‍ ഷാജുവിനാണ് മത്സരത്തിനിറങ്ങാനാവാതെ മടങ്ങേണ്ടണ്ടി വന്നത്. 

തൃശൂര്‍ ആളൂര്‍ ആര്‍.എം.എച്ച്.എസ് വിദ്യാര്‍ഥിയായ നിബിന്‍ മെഡല്‍ പ്രതീക്ഷയുമായാണ് മൈതാനത്തേക്ക വന്നത്. സ്വന്തമായി പോളുണ്ടായിരുന്നില്ല. മറ്റു മൂന്നുപേര്‍ക്കും പോളില്ലായിരുന്നു. സംഘാടകര്‍ സാധാരണ മൂന്ന് പോള്‍ വരെ മത്സരിക്കാനായി നല്‍കാറുണ്ടണ്ട്. സ്വന്തമായി പോള്‍ വാങ്ങാനുള്ള സാമ്പത്തിക സ്ഥിതിയില്ലാത്തതിനാല്‍ മുളയിലായിരുന്നു പരിശീലനം. സ്വന്തമായി കായിക അധ്യാപകനുമില്ല. 

2017 ല്‍ പാലായില്‍ കായികമേള നടന്നപ്പോഴും നിബിന്‍ സ്വന്തമായി പോളില്ലാതെയാണ് മത്സരിക്കാനെത്തിയത്. അന്ന് മറ്റു മത്സരാര്‍ഥികളാണ് പോള്‍ നല്‍കിയത്. കടം വാങ്ങിയ പോളില്‍ മത്സരിച്ച നിബിന്‍ ജൂനിയര്‍ വിഭാഗത്തില്‍ വെള്ളി നേടി. ഇത്തവണ പൊതുവായി പോളുണ്ടണ്ടാകുമെന്ന് അധികൃതര്‍ നേരത്തെ അറിയിച്ചിരുന്നെന്ന് നിബിന്‍ പറഞ്ഞു. എന്നാല്‍ സമയമായപ്പോള്‍ പോളില്ലെന്നു സംഘാടകര്‍ അറിയിച്ചു. 

ഇതോടെ നിബിന് മത്സരിക്കാന്‍ കഴിഞ്ഞില്ല. മത്സരാര്‍ഥികളുടെ ഭാരം പലതായതിനാല്‍ എല്ലാവര്‍ക്കും പോള്‍ അനുവദിക്കാനാകില്ലെന്നായിരുന്നു അധികൃതരുടെ പ്രതികരണം. തൃശൂര്‍ ചാലക്കുടിയില്‍ വേളാഞ്ചിറ വീട്ടില്‍ ഷാജുവിന്റെയും ജിനിയുടെയും മകനാണ് നിബിന്‍.