കല്‍പ്പറ്റ: സമൂഹത്തിന്റെ നാനാതുറയിലുള്ളവരുടെയും ഉള്‍പ്പെടുത്തല്‍ ലക്ഷ്യമിട്ട് കുടുംബശ്രീ ജില്ലാ മിഷന്‍ വിപുലമായ കാംപയിന്‍ ആരംഭിച്ചു. വയോജനങ്ങള്‍, ഭിന്നശേഷിക്കാര്‍, ട്രാന്‍സ്‌ജെന്‍ഡര്‍ എന്നീ വിഭാഗങ്ങളിലുള്ളവരെ കുടുംബശ്രീ സംഘടനാ സംവിധാനത്തില്‍ ഉള്‍പ്പെടുത്തുന്നതിനാണ് കാംപയിന്‍. ഇതിന്റെ ഭാഗമായി ജില്ലയിലെ ആദ്യ ട്രാന്‍സ്‌ജെന്‍ഡര്‍ അയല്‍ക്കൂട്ടം രൂപീകരിച്ചു.
ജില്ലയില്‍ ട്രാന്‍സ്‌ജെന്‍ഡര്‍ വിഭാഗത്തില്‍പ്പെട്ടവരായി ഇരുന്നൂറിലധികം പേരുണ്ടെന്നാണ് കണക്ക്. എന്നാല്‍ പൊതുസമൂഹം അംഗീകരിക്കാത്തതിനാല്‍ സ്വന്തം ഇഷ്ടങ്ങള്‍ക്കനുസരിച്ച് ജീവിക്കുന്നതിന് ഇവര്‍ ഏറെ പ്രയാസം അനുഭവിക്കുന്നുണ്ട്. ട്രാന്‍സ്‌ജെന്‍ഡര്‍ അയല്‍ക്കൂട്ടങ്ങള്‍ രൂപീകരിക്കുന്നതിനും പ്രവര്‍ത്തിക്കുന്നതിനും താല്‍പര്യമുള്ളവര്‍ക്ക് വിവിധ സി.ഡി.എസുകളില്‍ സൗകര്യമൊരുക്കും.
വയോധികര്‍, ഭിന്നശേഷിക്കാര്‍ എന്നീ വിഭാഗങ്ങളിലും പ്രത്യേക അയല്‍ക്കൂട്ടങ്ങള്‍ രൂപീകരിക്കാന്‍ ജില്ലാ മിഷന്‍ പദ്ധതിയുണ്ട്. വയോജനങ്ങളുടെയും ഭിന്നശേഷിക്കാരുടെയും സംഘടനകളുമായി ബന്ധപ്പെട്ടും സ്വയം താല്‍പര്യപ്പെട്ട് വരുന്നവരെയും സംവിധാനത്തില്‍ ഉള്‍പ്പെടുത്തും. പ്രത്യേക അയല്‍ക്കൂട്ടങ്ങള്‍ രൂപീകരിക്കുന്നവര്‍ക്ക് പ്രവര്‍ത്തന മൂലധനമായി ജില്ലാ മിഷന്‍ കോര്‍പ്പസ ്ഫണ്ട് അനുവദിക്കും. കൂടാതെ ഇവര്‍ക്കാവശ്യമായ കണക്കെഴുത്ത് പരിശീലനം, രജിസ്റ്ററുകള്‍ തുടങ്ങിയവയും വിതരണം ചെയ്യും. പട്ടിക വര്‍ഗ്ഗ വിഭാഗങ്ങള്‍ക്കായി തുടങ്ങിയ സ്‌പെഷ്യല്‍ അയല്‍ക്കൂട്ടങ്ങള്‍ പലതും മികച്ച പ്രവര്‍ത്തനം കാഴ്ചവെക്കുന്നതായാണ് വിലയിരുത്തലെന്ന് ജില്ലാ മിഷന്‍ കോര്‍ഡിനേറ്റര്‍ പി. സാജിത അറിയിച്ചു.