മാനന്തവാടി: തകര്‍ന്നു കിടക്കുന്ന തരുവണ- നിരവില്‍പ്പുഴ റോഡ് ഗതാഗതയോഗ്യമാക്കണമെന്നാവശ്യപ്പെട്ട് വെള്ളമുണ്ട, തൊണ്ടര്‍നാട് പഞ്ചായത്ത് യു.ഡി.എഫ് സംയുക്തകമ്മിറ്റി ഓഗസ്റ്റ് രണ്ടിന് നടത്താനിരുന്ന ഹര്‍ത്താല്‍ മാറ്റിവച്ചതായി ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു.
കഴിഞ്ഞ 22ന് പൊതുമരാമത്ത് വകുപ്പ് റോഡ് വിഭാഗം അസിസ്റ്റന്റ് എക്‌സി. എന്‍ജിനിയര്‍, പടിഞ്ഞാറെത്തറ എ.ഇ എന്നിവരുമായി യു.ഡി.എഫ് നേതാക്കള്‍ നടത്തിയ ചര്‍ച്ചയില്‍ റോഡിലുള്ള വലിയ കുഴികള്‍ ക്വാറിവേസ്റ്റ് ഉപയോഗിച്ച് നികത്താമെന്നും കരാര്‍ നല്‍കിയ നവീകരണ പ്രവൃത്തകള്‍ എത്രയും പെട്ടെന്ന് തുടങ്ങുമെന്നും അറിയിച്ചതിനെ തുടര്‍ന്നാണ് ഹര്‍ത്താല്‍ മാറ്റിവക്കുന്നതെന്നും ഭാരവാഹികള്‍ പറഞ്ഞു.
പത്തു കോടിയുടെ നവീകരണ പ്രവൃത്തക്ക് 2015 ഡിസംബറില്‍ ഭരണാനുമതിയും 2016 നവംബറില്‍ സാങ്കേതികാനുമതിയും ലഭിച്ചിട്ടും പ്രവൃത്തി തുടങ്ങാത്തതില്‍ പ്രതിഷേധിച്ചാണ് ഹര്‍ത്താലിന് ആഹ്വാനം ചെയ്തതെന്നും ഭാരവാഹികളായ പി.കെ അമീന്‍, എം.ജെ ചാക്കോ, പി.സി ഇബ്രാഹിം ഹാജി, കൊടുവേരി അമ്മദ് എന്നവര്‍ വാര്‍ത്താസമ്മേളനത്തില്‍ അറിയിച്ചു.