#ഉബൈദുല്ല റഹ്മാനി

മനാമ: ബഹ്‌റൈനില്‍ രണ്ടാം റൗണ്ട് തെരഞ്ഞെടുപ്പ് ശനിയാഴ്ച (ഡിസം.1ന്) നടക്കും. രാവിലെ 8 മുതല്‍ രാത്രി 8 വരെയാണ് പോളിങ് സമയം. 24 മണിക്കൂര്‍ മുമ്പെ എല്ലാ പ്രചാരണവും നിര്‍ത്തിവയ്ക്കണമെന്ന നിര്‍ദേശം കര്‍ശനമായി പാലിക്കുന്നുണ്ട്. മുന്‍ വര്‍ഷങ്ങളെ അപേക്ഷിച്ച് ഇത്തവണ ഭൂരിപക്ഷം മണ്ഡലങ്ങളിലും രണ്ടാംഘട്ട പോളിങ് നടക്കുന്നുണ്ട്. കഴിഞ്ഞ ശനിയാഴ്ചയായിരുന്നു ആദ്യ റൗണ്ട് വോട്ടെടുപ്പ്. ഇതില്‍ ചരിത്രത്തിലാദ്യമായി 67 ശതമാനം പേര്‍ വോട്ട് രേഖപ്പെടുത്തിയിരുന്നു.

ബഹ്‌റൈനിലെ തിരഞ്ഞെടുപ്പ് രീതിയനുസരിച്ച് ആകെ പോള്‍ ചെയ്യുന്ന വോട്ടിന്റെ 51 ശതമാനത്തിനു മുകളില്‍ വോട്ട് നേടുന്നവര്‍ക്ക് മാത്രമേ വിജയിക്കാനാകുകയുള്ളൂ എന്നതിനാല്‍ ആകെയുള്ള 40 പാര്‍ലിമെന്റ് സീറ്റുകളില്‍ 7 പേര്‍ക്ക് മാത്രമാണ് ആദ്യ ഘട്ട വോട്ടെടുപ്പില്‍ വിജയിക്കാനായത്. ബാക്കി സീറ്റുകളിലാണ് ശനിയാഴ്ച വീണ്ടും തിരഞ്ഞെടുപ്പ് നടക്കുന്നത്. ഇപ്രകാരം രണ്ടാം റൗണ്ട് തിരഞ്ഞെടുപ്പ് കഴിയുന്നതോടെ മാത്രമേ വിജയികളുടെ പൂര്‍ണ ചിത്രം വ്യക്തമാകുകയുള്ളു.

തെരഞ്ഞെടുപ്പിന്റെ ആദ്യഘട്ടം വിജയകരമായി പൂര്‍ത്തിയാക്കാന്‍ സഹകരിച്ച ജനങ്ങളോട് മന്ത്രിസഭ പ്രത്യേകം നന്ദി അറിയിച്ചു.