വടകര: യൂത്ത് ലീഗിന്റെ യുവജന യാത്രയുടെ ഭാഗമായി ആകാശത്തേക്ക് പറത്തിയ എല്‍.ഇ.ഡി ബള്‍ബുകള്‍ പ്രകാശിപ്പിച്ച പാരച്യൂട്ട് റെയില്‍വേയുടെ ഇലക്ട്രിക് ലൈനില്‍ കുരുങ്ങി ട്രെയിന്‍ ഗതാഗതം തടസപ്പെട്ടു. ഇന്നലെ വൈകിട്ട് യുവജന യാത്രയുടെ സമാപനത്തിന്റെ ഭാഗമായി കോട്ടപറമ്പില്‍ നല്‍കിയ സ്വീകരണത്തിനിടെയാണ് പ്രവര്‍ത്തകര്‍ എല്‍.ഇ.ഡി ബള്‍ബുകള്‍ നിറച്ച പാരച്യൂട്ട് ആകാശത്തേക്ക് പറത്തി വിട്ടത്.
സിഗ്‌നല്‍ തകരാറിലായതോടെ മംഗളൂരു ഭാഗത്തേക്കുള്ള ട്രെയിന്‍ ഗതാഗതം തടസപ്പെട്ടു. ഇലക്ട്രിക് ലൈനില്‍ കുരുങ്ങിയ പാരച്യൂട്ട് ഏറെ നേരം കത്തിക്കൊണ്ടിരുന്നു. സിഗ്‌നല്‍ തകരാറിലായതിനെ തുടര്‍ന്ന് എറണാകുളത്തുനിന്ന് നിസാമുദ്ദീനിലേക്ക് പോകുകയായിരുന്ന നേത്രാവതി എക്‌സ്പ്രസ് വടകരയിലും മംഗള എക്‌സ്പ്രസ് തിക്കോടിയിലും കൊച്ചുവേളി എക്‌സ്പ്രസ് കൊയിലാണ്ടിയിലും മണിക്കൂറുകളോളം പിടിച്ചിട്ടു.
കൊയിലാണ്ടിയില്‍ നിന്ന് ഇലക്ട്രിക്കല്‍ വിഭാഗം എത്തി ട്രെയിന്‍ ഗതാഗതം പുനഃസ്ഥാപിച്ചു. സിഗ്‌നല്‍ കേടാക്കി ട്രയിന്‍ ഗതാഗതം തടസപ്പെടുത്തിയതിന് മുസ്‌ലിം യൂത്ത് ലീഗ് നേതാക്കള്‍ക്കെതിരേ കേസെടുക്കുമെന്ന് വടകര പൊലിസ് പറഞ്ഞു.