വയനാട്: ഷഹല ഷെറിന് പാമ്പുകടിയേറ്റ സര്‍വജന സ്‌കൂളിലെ ക്ലാസ് മുറി പൊളിച്ചുനീക്കി പുതിയ കെട്ടിടം പണിയാന്‍ സര്‍വകക്ഷി യോഗത്തിന്റെ തീരുമാനം. ബത്തേരി മുനിസിപ്പാലിറ്റി ആസ്ഥാനത്ത് ചേര്‍ന്ന യോഗത്തിലാണ് പുതിയ തീരുമാനങ്ങളുണ്ടായിരിക്കുന്നത്.

സ്‌കൂള്‍ പ്രിന്‍സിപ്പലുള്‍പ്പെടെ മൂന്ന് അധ്യാപകര്‍ ഒളിവില്‍പോയ സാഹചര്യത്തില്‍ മറ്റൊരധ്യാപകന് പ്രിന്‍സിപ്പലിന്റെ ചുമതല നല്‍കാനും വിദ്യാര്‍ഥികള്‍ക്ക് പ്രത്യേക കൗണ്‍സിലിങ്ങ് നടത്താനും ശുചീകരണ പ്രവര്‍ത്തികള്‍ കാര്യക്ഷമമായി നടത്താനും യോഗം തീരുമാനിച്ചു. അതേസമയം സ്‌കൂളിന്റെ ശോചനീയാവസ്ഥ സംബന്ധിച്ചും അധ്യാപകര്‍ക്കെതിരേയും വെളിപ്പെടുത്തല്‍ നടത്തിയ വിദ്യാര്‍ഥികള്‍ക്കെതിരേ പ്രതികാര നടപടി സ്വീകരിക്കരുതെന്നും പ്രത്യേക നിര്‍ദേശമുയര്‍ന്നു.

സംഭവത്തിന് ശേഷം അവധി തുടരുന്നതിനാല്‍ യു.പി വിഭാഗം വിദ്യാര്‍ഥികള്‍ക്ക് ഒരാഴ്ച കഴിഞ്ഞും ഹൈസ്‌കൂള്‍ ഹയര്‍സെക്കന്‍ഡറി ക്ലാസുകളിലെ കുട്ടികള്‍ക്ക് ചൊവ്വാഴ്ചയും ക്ലാസുകള്‍ ആരംഭിക്കാന്‍ തീരുമാനിച്ചിട്ടുണ്ട്. സ്‌കൂളിലെ പ്രധാനാധ്യാപകന്‍ മോഹന്‍കുമാര്‍, പ്രിന്‍സിപ്പല്‍ കരുണാകരന്‍, അധ്യാപകന്‍ ഷിജില്‍ എന്നിവര്‍ സംഭവശേഷം ഒളിവിലാണ്. ഇവര്‍ക്കെതിരേ പൊലിസ് കേസ് ചുമത്തിയിട്ടുണ്ട്. ഇവരുടെ വീടുകളില്‍ പൊലിസ് പോയിരുന്നെങ്കിലും അറസ്റ്റ് ചെയ്യാനായിരുന്നില്ല.