സ്വന്തം ലേഖകന്‍

തിരുവനന്തപുരം: സംസ്ഥാനത്ത് ഡെങ്കിപ്പനി ലക്ഷണങ്ങളോടെ ഈ മാസം ചികിത്സ തേടിയത് 1,170 പേര്‍. ഇവരില്‍ 457 പേരില്‍ രോഗം സ്ഥിരീകരിക്കുകയും ഒരാള്‍ മരിക്കുകയും ചെയ്തു.
ഈ കഴിഞ്ഞ ശനിയാഴ്ച 42 പേര്‍ ഡെങ്കിപ്പനി ലക്ഷണങ്ങളോടെ ചികിത്സ തേടി. ഇവരില്‍ 13 പേരില്‍ രോഗം സ്ഥിരീകരിച്ചു. മഴ തുടരുന്നതിനാല്‍ കഴിഞ്ഞ മൂന്നുമാസമായി ഡെങ്കിപ്പനി ബാധിതരുടെ എണ്ണത്തില്‍ വലിയതോതിലുള്ള വര്‍ധനവാണ് സംസ്ഥാനത്തുണ്ടായത്.
കഴിഞ്ഞ മാസം 1,739 പേരും സെപ്റ്റംബറില്‍ 1,451 പേരും ഓഗസ്റ്റില്‍ 2265 പേരും ചികിത്സ തേടിയിരുന്നു.
ഇതിനുപുറമേ ഈ മാസം എലിപ്പനിയുടെ ലക്ഷണങ്ങളോടെ 376 പേര്‍ ചികിത്സ തേടി. ഇവരില്‍ 154 പേരില്‍ രോഗം സ്ഥിരീകരിക്കുകയും ആറുപേര്‍ മരണപ്പെടുകയുംചെയ്തു.
ഒന്‍പത് പേരുടെ മരണം എലിപ്പനി മൂലമാണെന്ന് സംശയിക്കുന്നുമുണ്ട്. മഞ്ഞപ്പിത്തം ബാധിച്ച് 586 പേരും ചിക്കന്‍പോക്‌സ് ബാധിച്ച് 1585 പേരും ചികിത്സ തേടിയിട്ടുണ്ട്. സാധാരണ പനി ബാധിച്ച് 1.7 ലക്ഷം പേരും ചികിത്സ തേടി.
പകര്‍ച്ചവ്യാധി പ്രതിരോധ യജ്ഞമായ 'ആരോഗ്യജാഗ്രത'യുടെ പ്രവര്‍ത്തനങ്ങള്‍ ഊര്‍ജിതമാണെന്നും ഡെങ്കിപ്പനിയും മറ്റും സ്ഥിരീകരിക്കുന്നിടങ്ങള്‍ കേന്ദ്രീകരിച്ച് പ്രത്യേകം ബോധവല്‍ക്കരണങ്ങളും പ്രതിരോധ പ്രവര്‍ത്തനങ്ങളും നടത്തുന്നുണ്ടെന്നും ആരോഗ്യവകുപ്പ് ഡയരക്ടര്‍ ആര്‍.എല്‍ സരിത പറഞ്ഞു.