നെടുമങ്ങാട്: മോഷണ ശ്രമത്തിനിടെ സ്വന്തം ബൈക്ക് ഉപേക്ഷിച്ചു കടന്നശേഷം പൊലിസില്‍ പരാതി നല്‍കിയ യുവാവ് ഉള്‍പ്പടെ മൂന്നംഗ ബൈക്ക് മോഷണ സംഘം നെടുമങ്ങാട് പൊലിസിന്റെ പിടിയിലായി.
നന്നാട്ടുകാവ് പുളിമാത്തൂര്‍ ശിവാലയത്തില്‍ കണ്ണന്‍ എന്ന വിഷ്ണു (23),കണ്ണമ്മൂല ഇലങ്കംവിളാകം സി.എസ് നിവാസില്‍ ലല്ലു എന്ന സജിന്‍ (24), കടകംപള്ളി കളിയിലില്‍ വീട്ടില്‍ നന്ദു എന്ന നന്ദകുമാര്‍ (21) എന്നിവരാണ് പിടിയിലായത്. ഇവര്‍ മോഷ്ടിച്ച നാല് ബൈക്കുകളും കണ്ടെടുത്തു.
കഴിഞ്ഞ 21 നു രാത്രി വലിയമല, ഉഴപ്പാക്കോണം, കരിപ്പൂര്‍ ഭാഗങ്ങളില്‍ നിന്ന് മോഷ്ടിച്ച ബൈക്കുകളുമായി രക്ഷപ്പെടാനുള്ള ശ്രമത്തിനിടെ സ്ഥലത്തെ സി.സി.ടി.വി കാമറ തകര്‍ക്കാന്‍ സംഘം ശ്രമിച്ചിരുന്നു. ശബ്ദം കേട്ട് പരിസരവാസികള്‍ എത്തിയപ്പോള്‍ വിഷ്ണു സ്വന്തം ബൈക്ക് ഉപേക്ഷിച്ച് മറ്റു പ്രതികള്‍ക്കൊപ്പം കടന്നു കളയുകയായിരുന്നു. ബൈക്കിന്റെ ആര്‍.സി പരിശോധനയില്‍ ഉടമ പോത്തന്‍കോട് സ്വദേശി വിഷ്ണുവാണെന്ന് തെളിഞ്ഞു.
ഇതേദിവസം തന്നെ വിഷ്ണു പോത്തന്‍കോട് സ്റ്റേഷനില്‍ തന്റെ ബൈക്ക് മോഷണം പോയതായി പരാതിയും നല്‍കി. മൊബൈല്‍ ടവര്‍ കേന്ദ്രീകരിച്ചു നടത്തിയ അന്വേഷണത്തില്‍ ബൈക്ക് മോഷ്ടിക്കപ്പെട്ട രാത്രിയില്‍ വിഷ്ണു വലിയമലയില്‍ ഉണ്ടായിരുന്നതായി പൊലിസിന് ബോധ്യപ്പെട്ടു. തുടര്‍ന്ന് നടന്ന ചോദ്യം ചെയ്യലിലാണ് വാദി പ്രതിയായത്.
വിഷ്ണുവും കൂട്ടരും ശ്രീകാര്യം, കഴക്കൂട്ടം ,വട്ടപ്പാറ, മെഡിക്കല്‍ കോളജ്, നേമം, തമ്പാനൂര്‍ സ്റ്റേഷനുകളില്‍ നിരവധി ബൈക്ക് മോഷണകേസിലും കഞ്ചാവ് കടത്തു കേസിലും പ്രതികളാണെന്ന് പൊലിസ് അറിയിച്ചു.
നെടുമങ്ങാട് എ.എസ്.പി സുജിത് ദാസിന്റെയും ഷാഡോ ഡിവൈ.എസ്.പി അശോകിന്റെയും നേതൃത്വത്തില്‍ എസ്.ഐമാരായ പി. ലൈലാബീവി, ബാബു, എ.എസ്.ഐമാരായ ജയന്‍, ഷിബു, സുനില്‍, സി.പി.ഒമാരായ നെവിന്‍ സുനില്‍, അനൂപ്, ജസ്‌നാദ് എന്നിവരടങ്ങിയ സംഘമാണ് പ്രതികളെ പിടികൂടിയത്.