ഫറോക്ക്: കരനെല്‍ കൃഷിയെക്കുറിച്ച് കൂടുതല്‍ അടുത്തറിയാന്‍ കഴിഞ്ഞ സന്തോഷത്തിലാണ് നല്ലൂര്‍ ഗവ. ഗണപത് യു.പി സ്‌കൂളിലെ വിദ്യാര്‍ഥികള്‍. പഠനത്തിന്റെ ഭാഗമായാണ് പറമ്പത്ത് കാവിനു സമീപത്തെ കരനെല്‍ കൃഷിയിടം വിദ്യാര്‍ഥികള്‍ സന്ദര്‍ശിച്ചത്.
മുക്കാല്‍ ഭാഗത്തോളം വെള്ളം നില്‍ക്കുന്ന പാടങ്ങളില്‍ നെല്ല് കൃഷി ചെയ്യുകയെന്നതിനു വിപരീതമായി പറമ്പും നെല്‍കൃഷിയിടമാക്കാമെന്ന പുതിയ അറിവാണ് സന്ദര്‍ശനത്തിലൂടെ ലഭിച്ചതെന്നു വിദ്യാര്‍ഥികള്‍പറഞ്ഞു. കുട്ടികള്‍ക്കൊപ്പം അവരുടെ സംശയങ്ങള്‍ക്ക് ഉത്തരം നല്‍കാന്‍ ഫറോക്ക് മുനിസിപ്പാലിറ്റിയിലെ അസിസ്റ്റന്റ് കൃഷി ഓഫിസര്‍മാരായ രേവതി, ബീന എന്നിവരും ഉണ്ടായിരുന്നു. പറമ്പത്ത്കാവ് കെ. പ്രവീണിന്റെ ഉടമസ്ഥതയിലുള്ള ഇരുപത് സെന്റ് ഭൂമിയിലാണ് കേരള കര്‍ഷകസംഘം ഫറോക്ക് ഈസ്റ്റ് മേഖലാ കമ്മിറ്റിയുടെ നേതൃത്വത്തില്‍ കരനെല്‍ കൃഷിയിറക്കിയത്.
കുട്ടികള്‍ക്കൊപ്പം അധ്യാപകരായ ടി.പി ഷീജകുമാരി, മെറി റോസ്, മിജ്‌ന, സലാഹ് പി.ടി.എ. പ്രസിഡന്റ് സുധാകരന്‍, വൈസ് പ്രസിഡന്റ് ജാഫര്‍ഖാന്‍ എന്നിവരുമുണ്ടായിരുന്നു.