പയ്യന്നൂര്‍: സാധാരണക്കാരായ രോഗികളുടെ ആശ്രയമായ പയ്യന്നൂര്‍ സര്‍ക്കാര്‍ താലൂക്ക് ആശുപത്രിയെ അധികൃതര്‍ തീര്‍ത്തും അവഗണിക്കുന്നു. ആവശ്യമായ സൗകര്യങ്ങള്‍ ഒരുക്കാതെയും ഡോക്ടര്‍മാരെ നിയമിക്കാതെയും ആശുപത്രിയെ തകര്‍ക്കാനാണ് നീക്കമെന്ന ആരോപണം ഇതിനകം ശക്തമായി കഴിഞ്ഞു. കഴിഞ്ഞ ഏതാനും മാസങ്ങളായി ആശുപത്രിയില്‍ ആവശ്യത്തിന് ഡോക്ടര്‍മാരില്ല. പുതിയ സര്‍ക്കാര്‍ വന്നതിനു ശേഷമാണ് പയ്യന്നൂര്‍ താലൂക്ക് ആശുപത്രിയോടു വലിയ അവഗണന ഉണ്ടായതെന്നും ആരോപണമുണ്ട്.
    22 ഡോക്ടര്‍മാര്‍  ആവശ്യമുള്ള  ആശുപത്രിയില്‍ നിലവില്‍ 12 പേര്‍ മാത്രമാണുള്ളത്. വിവിധ ചുമതലകള്‍ വഹിക്കുന്നതും വകുപ്പ് തല യോഗങ്ങളും കാരണം ഇതില്‍ തന്നെ പലരും എല്ലാ ദിവസവും ആശുപത്രിയില്‍ എത്തുന്നുമില്ല. മുന്‍ കാലങ്ങളെ അപേക്ഷിച്ച് മൂന്നൂറു മുതല്‍ അഞ്ഞൂറു വരെയാണ് ഒ.പി യിലെത്തുന്ന രോഗികളുടെ ശരാശരി എണ്ണം. ഇപ്പോള്‍ പനി ഉള്‍പ്പെടെയുള്ള പകര്‍ച്ചവ്യാധികള്‍ പെരുകിയതോടെ ഒ.പി അഞ്ഞൂറിനും മുകളിലാണ്. ഡോക്ടര്‍മാരില്ലാത്തതിനാല്‍ ആശുപത്രി അധികൃതരും രോഗികളും തമ്മിലുള്ള വാക്കേറ്റവും പതിവാണ്.
ആശുപത്രിയില്‍ നേരത്തെ ഉണ്ടായിരുന്ന ഓര്‍ത്തോ വിഭാഗത്തിലെ ഡോക്ടര്‍ മാറിപ്പോയിട്ട് മാസങ്ങള്‍ കഴിഞ്ഞു. എന്നാല്‍ പകരം പുതിയ ഡോക്ടറെ നിയമിച്ചില്ല. ദൂര സ്ഥലങ്ങളില്‍ നിന്നു പോലും രോഗികള്‍ ഇവിടെ എത്താറുണ്ടായിരുന്നു. നല്ല നിലയില്‍ പ്രവര്‍ത്തിച്ചു വന്ന നേത്ര, ദന്ത വിഭാഗവും ഇപ്പോള്‍ അടഞ്ഞു കിടക്കുകയാണ്. എക്‌സ്‌റേ, ലാബ് പ്രവര്‍ത്തനം നിലച്ചിട്ടു നാളേറെയായി. ആവശ്യമായ കെട്ടിട സൗകര്യമുണ്ടെങ്കിലും ഇതൊന്നും രോഗികള്‍ക്ക് ഉപയോഗപ്രദമായ നിലയിലേക്ക് മാറ്റാന്‍ അധികൃതര്‍ക്ക് കഴിഞ്ഞിട്ടില്ല. ആശുപത്രിയിലെ ഡോക്ടര്‍മാരുടെ ഒഴിവുകള്‍ നികത്താത്തതു സ്വകാര്യ ആശുപത്രികളെ സഹായിക്കാനാണെന്ന ആരോപണം ശക്തമാണ്.