ചാലക്കുടി: വിദ്യാഭ്യാസ മന്ത്രി പ്രൊഫ.സി.രവീന്ദ്രനാഥിന്റെ കാര്‍ കൊരട്ടിയില്‍ അപകടത്തില്‍പ്പെട്ടു. മന്ത്രിയും അംഗരക്ഷനും ഡ്രൈവറും പരുക്കേല്‍ക്കാതെ രക്ഷപ്പെട്ടു. ഇന്നലെ രാത്രി 8.15 ഓടെയാണ് അപകടം. ദേശീയപാതയില്‍ കൊരട്ടി ജങ്ഷനിലെ സിഗ്നല്‍ കഴിഞ്ഞ് അങ്കമാലി ഭാഗത്തേക്ക് പോവുന്നതിനിടെയാണ് സംഭവം. മുന്നില്‍ പോയിരുന്ന രണ്ട് കാറുകള്‍ തമ്മില്‍ കൂട്ടിയിടിച്ചപ്പോള്‍ മന്ത്രിയുടെ കാര്‍ അപകടത്തില്‍പ്പെട്ട കാറിന്റെ പുറകിലിടിക്കുകയായിരുന്നു. അപകടത്തില്‍ കാറിന്റെ മുന്‍ ഭാഗം പാടെ തകര്‍ന്നു. മന്ത്രി കാറിന്റെ പിന്‍സീറ്റിലായിരുന്നു യാത്ര ചെയ്തിരുന്നത്. കൊരട്ടി പൊലിസ് സ്ഥലത്തെത്തി മേല്‍നടപടി സ്വീകരിച്ചു. ആലുവയിലേക്ക് പോവുകയായിരുന്ന മന്ത്രി എസ്‌കോര്‍ട്ട് വന്ന പൊലിസ് ജീപ്പില്‍ യാത്ര തുടര്‍ന്നു.