മൈസൂരു: ക്യാപ്റ്റന്‍ തിമ്മപ്പയ്യ സ്മാരക ചതുര്‍ദിന പോരാട്ടത്തില്‍ ഗുജറാത്തിനെതിരേ കേരളത്തിന് 239 റണ്‍സ് വിജയ ലക്ഷ്യം. മൂന്നാം ദിനം കളി നിര്‍ത്തുമ്പോള്‍ രണ്ടാമിന്നിങ്‌സ് തുടങ്ങിയ കേരളം ഒരു റണ്‍സെടുത്തിട്ടുണ്ട്. ഒരു ദിവസവും പത്ത് വിക്കറ്റുകളും അവശേഷിക്കേ കേരളത്തിന് 238 റണ്‍സ് കൂടി വേണം വിജയത്തിലേക്ക്. ഒരു റണ്ണുമായി രോഹന്‍ കുന്നുമലും റണ്ണൊന്നുമെടുക്കാതെ വിഷ്ണു വിനോദുമാണ് ക്രീസില്‍. നേരത്തെ കേരളത്തിന്റെ ആദ്യ ഇന്നിങ്‌സ് 284 റണ്‍സില്‍ അവസാനിച്ചിരുന്നു. വിക്കറ്റ് കീപ്പര്‍ ബാറ്റ്‌സ്മാന്‍ മുഹമ്മദ് അസ്ഹറുദ്ദീന്റെ സെഞ്ച്വറിയാണ് (141) കേരളത്തിന് ഭേദപ്പെട്ട സ്‌കോര്‍ സമ്മാനിച്ചത്. ഗുജറാത്ത് ഒന്നാം ഇന്നിങ്‌സില്‍ 311ഉം രണ്ടാമിന്നിങ്‌സില്‍ 211 റണ്‍സുമാണെടുത്തത്. നാല് വിക്കറ്റെടുത്ത സന്ദീപ് വാര്യര്‍, മൂന്ന് വിക്കറ്റ് വീഴ്ത്തിയ നിധീഷ് എന്നിവരുടെ ബൗളിങാണ് ഗുജറാത്തിന്റെ സ്‌കോര്‍ 211ല്‍ ഒതുക്കിയത്.