ന്യൂഡല്‍ഹി: 2032 ലെ ഒളിംപിക്‌സ് വേദി ഇന്ത്യക്ക് വേണമെന്ന ആവശ്യവുമായി ഇന്ത്യന്‍ ഒളിംപിക് കമ്മിറ്റി രംഗത്ത്. ഇതിനായി ഇന്ത്യന്‍ ഒളിംപിക് കമ്മിറ്റി അധികൃതര്‍ അന്താരാഷ്ട്ര ഒളിംപിക്‌സ് കമ്മിറ്റിക്ക് അപേക്ഷ നല്‍കിയിരിക്കുകയാണ്. ഇന്ത്യന്‍ ഒളിംപിക് അസോസിയേഷന്‍ പ്രസിഡന്റ് നരീന്ദര്‍ ബത്ര ഇത് സംബന്ധിച്ച് അന്താരാഷ്ട്ര ഒളിംപിക് കമ്മിറ്റി ചീഫ് തോമസ് ബാക്കുമായി ഈ വര്‍ഷം തുടക്കത്തില്‍ ചര്‍ച്ച നടത്തിയിരുന്നു. ഇന്ത്യന്‍ ഒളിംപിക് അസോസിയേഷന്‍ ജന. സെക്രട്ടറി രാജീവ് മെഹ്തയും മറ്റു മൂന്ന് അംഗങ്ങളും ചേര്‍ന്ന് ഇതുമായി ബന്ധപ്പെട്ട് അന്താരാഷ്ട്ര ഒളിംപിക്‌സ് കമ്മിറ്റിയുമായി ചര്‍ച്ച നടത്തി. ഈ ആവശ്യവുമായി അധികൃതരെ സന്ദര്‍ശിച്ചപ്പോള്‍ എത്രയോ മുമ്പ് തന്നെ ഇന്ത്യക്ക് ഒളിംപിക്‌സ് നടത്താമായിരുന്നു എന്ന മറുപടിയാണ് ലഭിച്ചതെന്ന് മെഹ്ത പറഞ്ഞു. ഡല്‍ഹിയിലും മുംബൈയിലുമായിരിക്കും വേദി ഒരുക്കുക. ആദ്യമായാണ് ഇന്ത്യയില്‍ ഒളിംപിക്‌സ് വേണമെന്ന ആവശ്യവുമായി അധികൃതര്‍ രംഗത്തെത്തുന്നത്. 2022ല്‍ 2032ലേക്കുള്ള ഒരുക്കങ്ങള്‍ തുടങ്ങുമെന്നും 2025ല്‍ വേദി പ്രഖ്യാപിക്കുമെന്നും അദ്ദേഹം കൂട്ടിച്ചേര്‍ത്തു.
ഇന്തോനേഷ്യ, ചൈന, ആസ്‌ത്രേലിയ, ദക്ഷിണ കൊറിയ, ജര്‍മനി തുടങ്ങിയ രാജ്യങ്ങളും ആവശ്യവുമായി രംഗത്തുണ്ട്. ഈ മാസം 22ന് നടക്കുന്ന യോഗത്തില്‍ ഇന്ത്യന്‍ ഒളിംപിക് അസോസിയേഷന്‍ കൂടുതല്‍ മുന്നേറ്റങ്ങള്‍ നടത്തുമെന്ന് ഭാരവാഹികള്‍ പറഞ്ഞു.