തിരൂര്‍: ടിക് ടോക് ചലഞ്ചിനെത്തുടര്‍ന്നുള്ള പ്രശ്‌നങ്ങള്‍ക്കിടെ കോളജ് വിദ്യാര്‍ഥികളും നാട്ടുകാരും തമ്മില്‍ തിരൂരില്‍ സംഘര്‍ഷം. സംഘര്‍ഷത്തില്‍ സ്ത്രീ ഉള്‍പ്പെടെ ഏഴ് പേര്‍ക്ക് പരുക്കേറ്റു. തിരൂര്‍ കോ ഓപറേറ്റീവ് കോളജ് പരിസരത്താണ് സംഘര്‍ഷമുണ്ടായത്.
ആക്രമണത്തില്‍ പരുക്കേറ്റവരെ ജില്ലാ ആശുപത്രിയില്‍ പ്രവേശിപ്പിച്ചു. നസീം, ഫര്‍ഹാന്‍, ഷാഹിദ്, ഷൗക്കത്ത്, സച്ചിന്‍, മന്നാന്‍ എന്നിവരെയാണ് സംഘര്‍ഷത്തില്‍ പരുക്കേറ്റ് ആശുപത്രിയില്‍ പ്രവേശിപ്പിച്ചത്.
കല്ലേറില്‍ തലയ്ക്ക് പരുക്കേറ്റ തിരൂര്‍ സൗത്ത് അന്നാര സ്വദേശി സുജാതയും തിരൂര്‍ ജില്ലാ ആശുപത്രിയില്‍ ചികിത്സ തേടി. കോളജിന് സമീപത്തെ കടയില്‍ ജോലി ചെയ്യുകയാണ് സുജാത. കല്ലേറില്‍ കടയിലെ ഗ്ലാസ് തകരുകയും കല്ല് തലയില്‍ പതിക്കുകയായുമായിരുന്നു.
ഇന്നലെ രാവിലെ പതിനൊന്നോടെയായിരുന്നു സംഘര്‍ഷം. കഴിഞ്ഞ വെള്ളിയാഴ്ച പ്രദേശവാസികളില്‍ ചിലരും വിദ്യാര്‍ഥികളും തമ്മിലുണ്ടായ സംഘര്‍ഷത്തിന്റെ തുടര്‍ച്ചയായാണ് ഇന്നലത്തെ സംഭവം.
താനൂര്‍ സ്വദേശികളായ വിദ്യാര്‍ഥികള്‍ നാട്ടില്‍നിന്ന് 25ലധികം വരുന്ന സംഘവുമായി എത്തി കമ്പിയും ക്രിക്കറ്റ് സ്റ്റംബും ഉപയോഗിച്ച് കോളജ് പരിസരത്ത് തമ്പടിച്ചവരെ ആക്രമിക്കുകയായിരുന്നുവെന്ന് പൊലിസ് പറഞ്ഞു.
കഴിഞ്ഞ വെള്ളിയാഴ്ച താനൂര്‍ സ്വദേശികളായ വിദ്യാര്‍ഥികളെ കോളജ് പരിസരത്ത് സ്ഥിരമായി തമ്പടിക്കുന്നവര്‍ മര്‍ദിച്ചിരുന്നു. ഇതിന്റെ പ്രതികാരമായാണ് തിരിച്ചും ആക്രമണമുണ്ടായത്. സാരമായി പരുക്കേറ്റവരെയാണ് ആശുപത്രിയില്‍ പ്രവേശിപ്പിച്ചത്. ആക്രമണം നടത്തിയവര്‍ പൊലിസെത്തിയപ്പോഴേക്കും ഓടിരക്ഷപ്പെട്ടു. സംഭവത്തെ തുടര്‍ന്ന് തിരൂര്‍ പൊലിസ് അന്വേഷണം തുടങ്ങി.