നിലമ്പൂര്‍: ഗോത്രവര്‍ഗ വിഭാഗം വിദ്യാര്‍ഥികള്‍ക്കായുള്ള വെളിയംതോട് ഇന്ദിരാഗാന്ധി സ്മാരക റസിഡന്‍ഷ്യല്‍ സ്‌കൂളില്‍ ആദിവാസി വിദ്യാര്‍ഥികളെ വെയിലത്ത് നിര്‍ത്തിപീഡിപ്പിച്ച സംഭവത്തില്‍ പൊലിസ് ജില്ലാ കലക്ടര്‍, ആര്‍.ഡി.ഒ എന്നിവര്‍ക്ക് റിപോര്‍ട്ട് സമര്‍പ്പിച്ചു.
അധ്യാപകര്‍ തമ്മിലുള്ള ചേരിപോരാണ് സംഭവത്തിനു പിന്നിലെന്നാണ് റിപോര്‍ട്ടിലുള്ളത്. ജില്ലാ കലക്ടര്‍ ഇടപെടണമെന്നും റിപോര്‍ട്ടിലുണ്ട്. അതേസമയം സംഭവം വിവാദമായതോടെ ആരോപണ വിധേയരായ അധ്യാപകര്‍ക്ക് സ്ഥലംമാറ്റത്തിന് സാധ്യതയുണ്ടെന്ന് വകുപ്പില്‍ ഒരു ഉയര്‍ന്ന ഉദ്യോഗസ്ഥന്‍ സൂചന നല്‍കി.
ദീര്‍ഘകാലമായി സ്‌കൂളില്‍ ജോലിചെയ്യുന്നവരെ സ്ഥലംമാറ്റണമെന്ന് പൊലിസ് ഇന്റലിജന്‍സ് വിഭാഗവും സര്‍ക്കാറിന് റിപോര്‍ട്ട് നല്‍കിയിട്ടുണ്ട്. ഐ.റ്റി.ഡി.പി ഓഫിസറും പട്ടിക വര്‍ഗവികസന ഡയറക്ടര്‍ക്ക് ഇന്നലെ റിപോര്‍ട്ട് സമര്‍പ്പിച്ചു.