തേഞ്ഞിപ്പലം: വികസനകാര്യങ്ങളിലും പഞ്ചായത്തിലെ സാധാരണക്കാര്‍ക്ക് ആനുകൂല്യം ലഭ്യമാക്കുന്നതിലും രാഷ്ട്രീയ താത്പര്യങ്ങള്‍ക്ക് അതീതമായും എല്ലാവരേയും വിശ്വാസത്തിലെടുത്തുമാണ് ഭരണസമിതി മുന്നോട്ട് പോകുന്നതെന്ന് തേഞ്ഞിപ്പലം ഗ്രാമപഞ്ചായത്ത് പ്രസിഡന്റ് സഫിയ റസാഖ് തോട്ടത്തിലും വൈസ്പ്രസിഡന്റ് വി സതിയും പ്രസ്താവനയില്‍ പറഞ്ഞു.
ഇപ്പോള്‍ സി.പി.എം നടത്തുന്നസമരം രാഷ്ട്രീയപ്രേരിതമാണ്. 2016-17 വര്‍ഷത്തില്‍ വികസന ഫണ്ടില്‍ നിന്നും 86 ശതമാനം ചെലവഴിച്ചു. ബാക്കി തുക 2017-18 വാര്‍ഷിക പദ്ധതിയില്‍ സ്പില്‍ ഓവര്‍ പ്രൊജക്റ്റായി ഉള്‍പ്പെടുത്തി അംഗീകാരം വാങ്ങി. ലൈഫ്മിഷന്‍ ഗുണഭോക്താക്കളുടെ ലിസ്റ്റ് അന്തിമമായി അംഗീകരിക്കാനുള്ള നടപടികള്‍ നടന്നുവരുന്നു.
ലൈഫ് മിഷന്റെ വിഭവസ്രോതസിനെ കുറിച്ച് സര്‍ക്കാര്‍ നിര്‍ദ്ദേശം ലഭ്യമാകുന്ന മുറയ്ക്ക് ഫണ്ട് വകയിരുത്തുന്നതാണ്. പകര്‍ച്ചവ്യാധി തടയുന്നതിനായി ആരോഗ്യ വകുപ്പും പഞ്ചായത്ത് ഭരണസമിതിയും സംയുക്തമായി പ്രതിരോധപ്രവര്‍ത്തനങ്ങള്‍, കൊതുക് നിവാരണ പ്രവര്‍ത്തനം സംഘടിപ്പിച്ചു. വാര്‍ഡ്തല സാനിറ്റേഷന്‍ കമ്മിറ്റി വിളിച്ച് ചേര്‍ത്തു. പൊതുസ്ഥലത്തെ ഓടകള്‍ വൃത്തിയാക്കി. എന്‍.എസ്.എസ് പ്രവര്‍ത്തകരെ പങ്കെടുപിച്ച് വീടുകളില്‍ സ്‌ക്വാഡ് പ്രവര്‍ത്തനം, ബോധവല്‍ക്കരണ ക്ലാസുകള്‍ തുടങ്ങിയവ സംഘടിപ്പിച്ചതായും ഭരണസമിതി അവകാശപ്പെട്ടു.