കൊൽക്കത്ത: 2026 ടി-20 ലോകകപ്പിൽ വെസ്റ്റ് ഇൻഡീസിനെ തകർത്ത് ഇന്ത്യ സെമി ഫൈനലിലേക്ക് മുന്നേറിയിരിക്കുകയാണ്. കൊൽക്കത്ത ഈഡൻ ഗാർഡനിൽ നടന്ന മത്സരത്തിൽ അഞ്ച് വിക്കറ്റുകൾക്കാണ് ഇന്ത്യയുടെ വിജയം. മത്സരത്തിൽ ആദ്യം ബാറ്റ് ചെയ്ത വിൻഡീസ് നിശ്ചിത ഓവറിൽ നാല് വിക്കറ്റ് നഷ്ടത്തിൽ 196 റൺസാണ് നേടിയത്. വിജയലക്ഷ്യം ഇന്ത്യ അഞ്ച് വിക്കറ്റ് നഷ്ടത്തിൽ മറികടന്നു.

മലയാളി സൂപ്പർതാരം സഞ്ജു സാംസണിന്റെ തകർപ്പൻ ഇന്നിങ്സിന്റെ കരുത്തിലാണ് ഇന്ത്യ സെമിയിലേക്ക് മുന്നേറിയത്. 50 പന്തിൽ നിന്നും പുറത്താകാതെ 97 റൺസ് നേടിയാണ് സഞ്ജു ഇന്ത്യയുടെ വിജയശില്പിയായത്. 12 ഫോറുകളും നാല് കൂറ്റൻ സിക്സുകളും അടങ്ങുന്നതാണ് മലയാളി താരത്തിന്റെ ഇന്നിംഗ്സ്. മത്സരത്തിൽ മൂന്ന് റൺസകലയാണ് സഞ്ജുവിന് സെഞ്ച്വറി നഷ്ടമായത്. സെഞ്ച്വറിക്കരികിലെത്തി മത്സരം സഞ്ജു ഫിനിഷ് ചെയ്യുകയായിരുന്നു. മത്സരത്തിൽ ബാറ്റ് കൊണ്ട് സെഞ്ച്വറി നേടിയില്ലെങ്കിലും ടി-20യിലെ ഒരു പുത്തൻ നാഴികക്കല്ലും സഞ്ജു സ്വന്തമാക്കി.

ഇന്റർനാഷണൽ ടി-20യിൽ 100 ഫോറുകൾ പൂർത്തിയാക്കിയാണ് സഞ്ജു മറ്റൊരു സെഞ്ച്വറി റെക്കോർഡ് തന്റെ പേരിൽ കുറിച്ചത്. ഇന്ത്യക്കായി ഇതുവരെ 60 ടി-20 മത്സരങ്ങളിൽ നിന്നും 102 ഫോറുകളാണ് സഞ്ജു നേടിയത്. 69 സിക്സുകളും സഞ്ജുവിന്റെ പേരിലുണ്ട്. ഇന്ത്യക്കായി മൂന്ന് സെഞ്ച്വറികളും നാല് അർദ്ധ സെഞ്ച്വറികളുമാണ് സഞ്ജുവിന്റെ ബാറ്റിൽ നിന്നും പിറന്നിട്ടുള്ളത്. 

മത്സരത്തിൽ മറ്റൊരു റെക്കോർഡും സഞ്ജു സ്വന്തമാക്കി. ടി-20 ലോകകപ്പിൽ ചെയ്‌സ് ചെയ്ത മത്സരങ്ങളിൽ ഒരു ഇന്ത്യൻ താരത്തിന്റെ ഏറ്റവും ഉയർന്ന സ്കോർ ആണ് സഞ്ജു കൊൽക്കത്തയിൽ അടിച്ചെടുത്തത്. വിരാട് കോഹ്‌ലിയുടെ പേരിലുണ്ടായ റെക്കോർഡാണ് സഞ്ജു തകർത്തത്. 2016 ടി-20 ലോകകപ്പിൽ ഓസ്‌ട്രേലിയക്കെതിരെ പുറത്താവാതെ 82 റൺസായിരുന്നു കോഹ്‌ലി നേടിയിരുന്നത്. ഈ നേട്ടത്തിൽ മൂന്നാം സ്ഥാനത്തുള്ളതും കോഹ്‌ലി തന്നെയാണ്. 2022ൽ പാകിസ്ഥാനെതിരെയായിരുന്നു കോഹ്‌ലി 82 റൺസ് നേടിയിരുന്നത്. 

അതേസമയം ഇനി ഇന്ത്യയുടെ മുന്നിലുള്ളത് സെമി ഫൈനൽ പോരാട്ടങ്ങളാണ്. മാർച്ച് അഞ്ചിനാണ് ഇന്ത്യയുടെ സെമി പോരാട്ടം നടക്കുന്നത്. ഇംഗ്ലണ്ടാണ് ഇന്ത്യയുടെ എതിരാളികൾ. ഒന്നാം സെമിയിൽ മാർച്ച് നാലിന് സൗത്ത് ആഫ്രിക്കയും ന്യൂസിലാൻഡും ഏറ്റുമുട്ടും. 

India has advanced to the semi-finals by defeating the West Indies in the 2026 T-20 World Cup. India advanced to the semi-finals on the strength of Sanju Samson's brilliant innings. Sanju became the architect of India's victory by scoring 97 runs not out from 50 balls. The Malayali player's innings consisted of 12 fours and four huge sixes. Sanju also achieved a new milestone in T-20. Sanju set another century record by completing 100 fours in international T-20s. Sanju has hit 102 fours in 60 T-20 matches for India so far.