ചെറുതുരുത്തി : വഴിയില്‍ നിന്ന് കിട്ടിയ സ്വര്‍ണാഭരണം ഉടമയ്ക്ക് തിരിച്ച് നല്‍കി യുവാവ് മാതൃകയായി. മത്സ്യത്തൊഴിലാളിയും ചെറുതുരുത്തി അത്തിക്കപറമ്പ് സ്വദേശി ആലസാക്കവീട്ടില്‍ ആലി കുട്ടിയുടെ മകന്‍ ഷാജിയാണ് സത്യസന്ധതയുടെ പ്രതീകമായത്.
ഇന്നലെയാണ് ഷാജിയ്ക്ക് ഒന്നര പവന്‍ തൂക്കമുള്ള സ്വര്‍ണമാലയും , ഒരു പവന്‍ കൈ ചെയിനും അടങ്ങിയ കവര്‍ വഴിയില്‍ നിന്ന് വീണ് കിട്ടിയത്. ഉടന്‍ തന്നെ ചെറുതുരുത്തി പൊലിസ് സ്റ്റേഷനില്‍ ഏല്‍പ്പിയ്ക്കുകയായിരുന്നു.
ഇതിനിടയിലാണ് സ്വര്‍ണാഭരണങ്ങള്‍ നഷ്ടപ്പെട്ട ദേശമംഗലം സ്വദേശി സോപാനം വീട്ടില്‍ സന്ദീപ് സങ്കടവുമായി പൊലിസ് സ്റ്റേഷനില്‍ എത്തുന്നത്. തുടര്‍ന്ന് എസ്. ഐ. ഷെയ്ക്ക് അമീദ് ഷാജിയെ വിളിച്ച് വരുത്തുകയും സ്വര്‍ണാഭരണങ്ങള്‍ സന്ദീപിന് കൈമാറുകയുമായിരുന്നു.