മണ്ണാര്‍ക്കാട്: വീട്ടുമുറ്റത്ത് നട്ടുപിടിപ്പിച്ച ഫാഷന്‍ ഫ്രൂട്ട് വള്ളിയില്‍ വിളഞ്ഞത് നിരവധി ഫ്രൂട്ടുകള്‍. കര്‍ക്കിടാംകുന്ന് പാലക്കടവിലെ ഏറാടന്‍ വീട്ടില്‍ വീരാന്‍ ഹാജിയുടെ മകന്‍ മുഹമ്മദ് ശരീഫാണ് ഫാഷന്‍ ഫ്രൂട്ട് കൃഷി പരീക്ഷണാടിസ്ഥാനത്തില്‍ തുടങ്ങിയത്.
ബന്ധുവീട്ടില്‍ നിന്ന് കൊണ്ടുവന്ന രണ്ട് ചെടികളാണ് ശരീഫ് മുറ്റത്തോട് ചേര്‍ന്നുളള കരിവേപ്പ് മരത്തിന് ചേര്‍ന്ന് വെച്ചുപിടിപ്പിച്ചത്. ദിവസവും രാവിലെയും വൈകീട്ടും നച്ച് തന്റെ കൃഷിയെ മികവുറ്റത്താക്കി.
പരീക്ഷണാടിസ്ഥാനത്തില്‍ തുടങ്ങിയ ഫാഷന്‍ഫ്രൂട്ട് കൃഷിരൂപത്തില്‍ വ്യാപകമാക്കാനുളള ഒരുക്കത്തിലാണ് ശരീഫ്. നിരന്തര പരിപാലനം നടത്തിയ ചെടിക്ക് ആദ്യം താല്‍കാലികമായി കയറുപയോഗിച്ച് പന്തലൊരുക്കിയെങ്കിലും, പിന്നീട് താല്‍കാലിക പന്തല്‍ ഒഴിവാക്കി പടര്‍ന്ന് പന്തലിക്കാന്‍ മുറ്റത്തിന് സമാന്തരമായി കടയില്‍ നിന്നും പ്ലാസ്റ്റികിന്റെ വല വാങ്ങി പന്തല്‍ ഒരുക്കുകയായിരുന്നു. ഡെങ്കി അടക്കമുളള പനികള്‍ക്ക് രക്തത്തിലെ കൗണ്ട് വര്‍ധിപ്പിക്കാന്‍ ഡോക്ടര്‍മാര്‍ നിര്‍ദേശിച്ചിരുന്ന പഴവര്‍ഗവുമാണിത്. മനുഷ്യ ശരീരത്തിന്റെ പ്രതിരോധ ശേഷി വര്‍ധിപ്പിക്കാന്‍ ഏറെ കഴിയുന്ന ഫാഷന്‍ ഫ്രൂട്ട് ഇതിനോടകം തന്നെ നിരവധി രോഗികള്‍ക്ക് പ്രയോജനകരമായിട്ടുണ്ട്.