താമരശേരി: ചുരത്തില്‍ ടൂറിസ്റ്റ് ബസ് കുടുങ്ങി മണിക്കൂറുകളോളം ഗതാഗതം തടസപ്പെട്ടു. ഇന്നലെ രാവിലെ ഏഴരയോടെ എട്ടാം വളവിനു താഴെയാണ് എന്‍ജിന്‍ തകരാര്‍ കാരണം ബസ് കുടുങ്ങിയത്. ഇതോടെ വലിയ വാഹനങ്ങള്‍ക്ക് കടന്നുപോകാന്‍ പ്രയാസം നേരിട്ടു. യാത്രക്കാരും രോഗികളടക്കമുള്ളവര്‍ ചുരത്തില്‍ കുടുങ്ങി.
സംഭവമറിഞ്ഞ് പൊലിസും ചുരം സംരക്ഷണ സമിതി അംഗങ്ങളുമെത്തി ചെറുവാഹനങ്ങളെ ഗതാഗതക്കുരുക്കില്‍ നിന്ന് ഒഴിവാക്കുകയായിരുന്നു. ആധുനിക ടെക്‌നോളജിയില്‍ നിര്‍മിച്ച ബസിന്റെ തകരാര്‍ പരിഹരിക്കാന്‍ പ്രാദേശിക വര്‍ക്‌സ് ഷോപ്പിലെ ജീവനക്കാര്‍ക്ക് കഴിയാത്തതിനാല്‍ കമ്പനിയില്‍ നിന്നുള്ള വിദഗ്ധരെ എത്തിച്ചാണ് പ്രശ്‌നം പരിഹരിച്ചത്. ഉച്ചയ്ക്ക് ഒന്നരയോടെ ഗതാഗതം പൂര്‍ണമായും പുനഃസ്ഥാപിച്ചു.