തുറവൂര്‍: പ്രാദേശികരാഷ്ട്രിയ നേതാവിനെയും സഹോദരനെയും അഞ്ചംഗസംഘം മര്‍ദിച്ചതായി പരാതി. ബി.എസ്.പി.അരൂര്‍ നിയോജക മണ്ഡലം കമ്മിറ്റി ട്രഷറര്‍ കോടംതുരുത്ത് പഞ്ചായത്ത് പതിനഞ്ചാം വാര്‍ഡില്‍ എഴുപുന്നതെക്ക് വളപ്പാനടിയില്‍ തിലകേഷ് (38), സഹോദരന്‍ സുമേഷ് (34) എന്നിവരെയാണ് കഴിഞ്ഞ ദിവസം വല്ലേത്തോട്ടില്‍ വച്ച് മര്‍ദിച്ചതായി കുത്തിയതോട് പൊലിസില്‍ നല്‍കിയ പരാതിയില്‍ പറയുന്നു.
സുമേഷിനെ ആലപ്പുഴ മെഡിക്കല്‍ കോളേജിലും തിലകേഷിനെ തുറവൂര്‍ താലൂക്കാശുപത്രിയിലും പ്രവേശിപ്പിച്ചു. മാസങ്ങള്‍ക്ക് മുമ്പ് സഹോദരിയോട് അസഭ്യം പറഞ്ഞതായിട്ടുള്ള കേസ് ഇവരുടെ പേരില്‍ കുത്തിയതോട് പൊലിസില്‍ നല്‍കിയതിന്റെ പകയാണ് മര്‍ദിക്കാന്‍ കാരണമെന്ന് പറയുന്നു.