കരുവാരകുണ്ട്: രാഹുല്‍ ഗാന്ധിയുടെ മണ്ഡല പര്യടനത്തിനിടെ പ്രസംഗം പരിഭാഷപ്പെടുത്തി പ്ലസ് ടു വിദ്യാര്‍ഥിനിയുടെ ഉഗ്രന്‍ പെര്‍ഫോമന്‍സ്.
മലപ്പുറം കരുവാരകുണ്ട് ഗവ എച്ച്.എസ്.എസിലെ സയന്‍സ് ലാബിന്റെ ഉദ്ഘാടന വേദിയിലായിരുന്നു സംഭവം. പ്രസംഗിക്കാനായി രാഹുല്‍ എത്തിയപ്പോള്‍ സദസില്‍ ഇരിക്കുകയായിരുന്ന സഫയെയാണ് പരിഭാഷ പെടുത്താനായി രാഹുല്‍ ക്ഷണിച്ചത്.

ക്ഷണം സ്വീകരിച്ച സഫ പരിഭ്രമമൊന്നുമില്ലാതെ വേദിയിലെത്തി ഏല്‍പ്പിച്ച ഉത്തരവാദിത്വം നിര്‍വഹിച്ചു.
മികച്ച രീതിയില്‍ തന്നെ പരിഭാഷയും വന്നപ്പോള്‍ സദസും കൈയടിച്ചു. പ്രസംഗം സോഷ്യല്‍ മീഡിയയിലും നിറയുകയാണ്.
വിദ്യാഭ്യാസ രംഗത്ത് കേരളത്തിന്റെ മികവുകള്‍ എടുത്തുപറഞ്ഞ രാഹുല്‍ ചില പോരായ്മകളും ചൂണ്ടിക്കാട്ടി. സയന്‍സിന്റെ പ്രാധാന്യത്തെക്കുറിച്ച് വിദ്യാര്‍ഥികളെയും രക്ഷിതാക്കളെയും ബോധ്യപ്പെടുത്തുകയും ചെയ്തു.

സഫ ഫെബിന്‍ സെബിന്‍ കരുവാരകുണ്ട് കുട്ടത്തിയിലെ മദ്‌റസാ അധ്യാപകനായ ഓടാല കുഞ്ഞിമുഹമ്മദ് മുസ്‌ലിയാരുടെയും സാറയുടെയും അഞ്ചു മക്കളില്‍ ഏറ്റവും ഇളയവളാണ്. സഫ ഫെബിന്‍. പത്താം ക്ലാസിലും പ്ലസ് വണ്ണിലും എല്ലാവിഷയങ്ങളിലും എ.പ്ലസ് സ്വന്തമാക്കിയ ഈ മിടുക്കി ഇപ്പോള്‍ പ്ലസ്ടു സയന്‍സ് വിദ്യാര്‍ഥിനിയാണ്. വാഫി കോഴ്‌സില്‍ ചേരാന്‍ താത്പര്യമുണ്ടായിരുന്നു. എന്‍ട്രന്‍സില്‍ അഞ്ചാം റാങ്കും ലഭിച്ചിരുന്നുവെങ്കിലും പിന്നീട് പോകാനായില്ല. ഇതുവരെ പഠിച്ചതെല്ലാം സര്‍ക്കാര്‍ വിദ്യാലയത്തില്‍ തന്നെയായിരുന്നു.