ലഖ്‌നൗ: ഉന്നാവോയില്‍ ബലാത്സംഗം ചെയ്യപ്പെട്ട യുവതിയെ പ്രതികള്‍ തീകൊളുത്തി കൊലപ്പെടുത്തി സംഭവത്തില്‍ സംസ്ഥാനത്താകെ പ്രതിഷേധം കനക്കുന്നു. ഇന്നലെ വൈകീട്ടോടെ മുഖ്യമന്ത്രി യോഗി ആതിഥ്യ നാഥിനാഥിന്റെ നിര്‍ദേശ പ്രകാരം യുവതിയുടെ വീട് സന്ദര്‍ശിക്കാനായി രണ്ട് ബി.ജെ.പി മന്ത്രിമാര്‍ ജനങ്ങളുടെയും കോണ്‍ഗ്രസ് പ്രവര്‍ത്തകരുടെയും പ്രതിഷേധത്തിന് മുന്നില്‍ പരുങ്ങി.

മന്ത്രിമാരായ കമല്‍ റാണി വരുണ്‍, സ്വാമി പ്രസാദ് മൗര്യ എന്നീ മന്ത്രിമാരാണ് ഉന്നാവോയില്‍എത്തിയത്. നിങ്ങള്‍ ഇപ്പോള്‍ എന്തിനിവിടെ വന്നു എന്നാക്രോശിച്ചുകൊണ്ട് ജനങ്ങള്‍ ഇവരുടെ വാഹനം തടയുകയായിരുന്നു. ഒടുവില്‍ ഏറെ പണിപ്പെട്ടാണ് പൊലിസിന് ഇവരുടെ വാഹനം കടത്തിവിടാനായത്. പ്രതിഷേധിച്ചവരെ പൊലിസ് ബലം പ്രയോഗിച്ച് നീക്കുകയായിരുന്നു. കുടുംബത്തെ സന്ദര്‍ശിച്ച ശേഷം മന്ത്രി സ്വാമി പ്രസാദ് മൗര്യ പ്രതികള്‍ക്ക് അര്‍ഹിക്കുന്ന ശിക്ഷ തന്നെ ലഭിച്ചിരിക്കുമെന്ന് വാക്കുനല്‍കി. കുടുംബം ആവശ്യപ്പെടുന്ന ഏത് തരം അന്വേഷണത്തിനും സര്‍ക്കാര്‍ ഒപ്പമുണ്ടാകുമെന്നും മന്ത്രി പറഞ്ഞു.

അതേസമയം സംസ്ഥാനത്താകെ യോഗി സര്‍ക്കാരിനെതിരായ പ്രതിഷേധം കനക്കുകയാണ്. കോണ്‍ഗ്രസ് നേതാക്കളായ രാഹുല്‍ ഗാന്ധിയും പ്രിയങ്കാ ഗാന്ധിയും ഉന്നാവോ സംഭവത്തില്‍ ബി.ജെ.പിക്കെതിരേ പരസ്യമായി രംഗത്തുവന്നിട്ടുണ്ട്. സമാജ്‌വാദി പാര്‍ട്ടി നേതാവ് അഖിലേഷ് യാദവ്, ബി.എസ്.പി അധ്യക്ഷ മായാവതി എന്നിവരും സംസ്ഥാന സര്‍ക്കാരിനെതിരേ രംഗത്തുവന്നു. പ്രിയങ്കാ ഗാന്ധി ഇന്ന് രാവിലെയോടെ പെണ്‍കുട്ടിയുടെ വസതിയിലെത്തി കുടുംബാംഗങ്ങളെ സന്ദര്‍ശിച്ചിരുന്നു. ഈ നാട്ടില്‍ പെണ്‍കുട്ടികള്‍ക്ക് ജീവിക്കാന്‍ സ്ഥലമില്ലെന്നാണ് പിന്നീട് അവര്‍ പറയുകയും ചെയ്തു.