ചേര്‍ത്തല: ഹയര്‍ സെക്കന്‍ഡറി അവസാന അലോട്ട്‌മെന്റ് കഴിഞ്ഞിട്ടും പ്രവേശനം ലഭിക്കാത്ത വിദ്യാര്‍ഥികള്‍ക്ക് ഓപ്പണ്‍ സ്‌കൂള്‍ റജിസ്‌ട്രേഷന് ആവശ്യമായ സമയം നല്‍കാതെ ഭീമമായ പിഴ ഈടാക്കുന്ന ഹയര്‍ സെക്കന്‍ഡറി ഡയരക്ടറേറ്റിന്റെ നടപടി പിന്‍വലിക്കണമെന്ന് പാരലല്‍ കോളജ് അസോസിയേഷന്‍ ജില്ലാ കമ്മിറ്റി ആവശ്യപ്പെട്ടു.
അലോട്ട്‌മെന്റിലൂടെ പ്രവേശനം ലഭിക്കുമെന്ന പ്രതീക്ഷയില്‍ കാത്തിരുന്ന വിദ്യാര്‍ഥികള്‍ ഓപ്പണ്‍ റജിസ്‌ട്രേഷന്റെ ഭാഗമായി ഓണ്‍ലൈനില്‍ റജിസ്റ്റര്‍ ചെയ്യുവാന്‍ ശ്രമിച്ചപ്പോഴാണ് കഴിഞ്ഞ 31ന് സമയപരിധി അവസാനിച്ചതായി മനസിലായത്.
ഇരുന്നൂറ്റിയമ്പത് രൂപ പിഴയോടെ ഒന്‍പത് വരെയാണ് നിലവില്‍ സമയപരിധിയുള്ളത്. എന്നാല്‍ കംപ്യൂട്ടര്‍ സെന്ററുകളുടെ സഹായത്തോടെ ഓണ്‍ലൈനില്‍ റജിസ്‌ട്രേഷന്‍ പൂര്‍ത്തിയാക്കി ചെലാന്‍ എടുത്ത് പോസ്റ്റ് ഓഫിസ് വഴി ഫീസ് അടക്കുന്നതിന് ഒരുമാസമെങ്കിലും കുറഞ്ഞത് സാവകാശം ആവശ്യമാണെന്നും അസോസിയേഷന്‍ ഭാരവാഹികള്‍ പറഞ്ഞു. ജില്ലാ പ്രസിഡന്റ് കെ.പി ഗോപാലകൃഷ്ണന്‍ അധ്യക്ഷനായി. സെക്രട്ടറി വി. ശ്യാമപ്രസാദ്, സിബി ജോര്‍ജ് സംസാരിച്ചു.