മുതലമട: ചുള്ളിയാര്‍, മീങ്കര ഡാമുകള്‍ സുരക്ഷയുമായി ബന്ധപെട്ട് പരാതികള്‍ പരിശോധിക്കുമെന്ന് ഡാം സുരക്ഷാ അതോറിറ്റി ചെയര്‍മാന്‍ ജസ്റ്റീസ് സി.എന്‍ രാമചന്ദ്രന്‍ നായര്‍. ഡാം സുരക്ഷാ അതോറിറ്റിയുടെ നേതൃത്വത്തില്‍ നടത്തിയ ചുള്ളിയാര്‍, മീങ്കര ഡാമുകളുടെ പരിശോധനക്ക് എത്തിയതായിരുന്നു അദ്ദേഹം. 25 പേരടങ്ങുന്ന സംഘമാണ് പരിശോധനക്കെത്തിയത്. രാവിലെ 11ന് ചുള്ളിയാര്‍ ഡാമിലെത്തിയ സംഘം ചുള്ളിയാര്‍ ഡാം പരിസരങ്ങളും ചെമ്മണാമ്പതിറോഡില്‍ ഡാമിനരുകിലായി പ്രവര്‍ത്തിക്കുന്ന കെട്ടിട നിര്‍മാണ സാമഗ്രികള്‍ നിര്‍മിക്കുന്ന ഫാക്ടറിയും സന്ദര്‍ശിച്ചു.
ഫാക്ടറി ഉള്‍പെടുന്ന പ്രദേശങ്ങള്‍ ഡാം സ്ഥലം കൈയേറി നിര്‍മിച്ചവയാണെണെന്നും അനുവാദമില്ലാതെ നിര്‍മിക്കുന്ന ഫാക്ടറിയുടെ ലൈസന്‍സ് പരിശോധിക്കണമെന്നുമുള്ള പരാതിയെ തുടര്‍ന്നാണ് സംഘത്തിന്റെ പരിശോധനയുണ്ടായത്. മീങ്കര ഡാമിലെ ഡിസ്റ്റിലറിയും സംഘം പരിശോധിച്ചു. മാലിന്യങ്ങള്‍ ഡാമിലേക്ക് ഒഴുക്കുന്നതായും ഭൂഗര്‍ഭജലം ചൂഷണം ചെയ്യുന്നതായുള്ള പരാതിയെ തുടര്‍ന്നാണ് ബീര്‍ ഫാക്ടറിയിലേക്ക് പരിശോധന നടത്തുവാനെത്തിയത്.
മീങ്കരഡാമിനടുത്ത് പ്രവര്‍ത്തിക്കുന്ന പേപ്പര്‍ നിര്‍മാണ ഫാക്ടറിയിലെത്തിയ സംഘം ഫാക്ടറിയിലെ മാലിന്യ സംസ്‌കരണ പ്രവര്‍ത്തനങ്ങള്‍ വിലയിരുത്തിയതിനു ശേഷമാണ് തിരിച്ചത്. ഡാം സുരക്ഷാ അതോറിറ്റി അംഗങ്ങളായ കെ.എച്ച് ഷംസുദ്ദീന്‍, ജോര്‍ജ് ജോസ്, ശിരുവാണി സൂപ്രണ്ടിങ് എന്‍ജിനീയര്‍ വി.പി ജോണ്‍, ബിജു പി വര്‍ഗീസ്, അബുദുല്‍ മുനീര്‍, കെ.പി ഹരികൃഷ്ണന്‍, കെ. നാരായണന്‍, ഹാരിസ് കരീം, സതീഷ് എന്നിവരടങ്ങുന്ന സംഘം അനുഗമിച്ചു.