കൊല്‍ക്കത്ത: ഈസ്റ്റ്ബംഗാളിന്റെ ഹോം ഗ്രൗണ്ടില്‍ പൊരുതി വീണ് ഗോകുലം. ഈസ്റ്റ് ബംഗാളിനോട് 3-1 നാണ് ഗോകുലം കേരള എഫ്. സി പരാജയപ്പെട്ടത്. 15 മിനുട്ടിനുള്ളില്‍ തന്നെ രണ്ട് ഗോള്‍ വഴങ്ങിയ ഗോകുലം ആത്മവിശ്വാസം വീണ്ടെടുത്ത് പൊരുതിയെങ്കിലും പരാജയം സമ്മതിച്ച് മടങ്ങി.
നാലാം മിനുട്ടില്‍ ബ്രാന്‍ഡന്‍ വാന്‍ലാല്‍റിമഡിക ഗോകുലത്തിന് ആദ്യ പ്രഹരം നല്‍കി. ഗോള്‍ തിരിച്ചടിക്കാനുള്ള ശ്രമങ്ങള്‍ക്കിടെ 10 മിനുട്ടിന് ശേഷം ഗോകുലം രണ്ടാമത്തെ ഗോളും വഴങ്ങി. മലയാളി താരം ജസ്റ്റിന്‍ ജോബിയുടെ വകയായിരുന്നു രണ്ടാമത്തെ ഗോള്‍. ആദ്യ പകുതിയില്‍ തന്നെ രണ്ട് ഗോളിന് പിന്നിലായ ഗോകുലം താരങ്ങള്‍ ഗോള്‍ മടക്കാന്‍ കിണഞ്ഞു പരിശ്രമിച്ചു.
മികച്ച മുന്നേറ്റങ്ങളുമായി ബംഗാള്‍ഗോള്‍മുഖം വിറപ്പിച്ചുകൊണ്ടേയിരുന്നു. എന്നാല്‍ ആദ്യ പകുതിയില്‍ ഗോകുലത്തിന് ഗോള്‍ കണ്ടെത്താനായില്ല. രണ്ടാം പകുതിയില്‍ പുതിയ ഊര്‍ജവുമായി തുടങ്ങിയ ഗോകുലം ഗോളിനായി പൊരുതിക്കൊണ്ടിരുന്നു. 57-ാം മിനുട്ടില്‍ ഗോകുലത്തിന്റെ പുതുമുഖ താരം ക്രിസ്റ്റ്യന്‍ സാബ ഗോള്‍ കണ്ടെത്തി സ്‌കോര്‍ 2-1 എന്ന നിലയിലാക്കി. സമനിലക്കായി ഗോകുലം ഈസ്റ്റ് ബംഗാള്‍ പോസ്റ്റിലേക്ക് ഇരമ്പിയെത്തിക്കൊണ്ടിരുന്നു.
ഇവിടെ നിന്ന് വീണ് കിട്ടുന്ന പന്തുകളുമായി ഈസ്റ്റ് ബംഗാള്‍ താരങ്ങള്‍ കൗണ്ടര്‍ അറ്റാക്കുമായി ഗോകുലം ഗോള്‍മുഖത്തും ഭീതിവിതച്ചു.
മികച്ചൊരു കൗണ്ടര്‍ അറ്റാക്കില്‍ നിന്ന് ഈസ്റ്റ് ബംഗാളിന്റെ മൂന്നാം ഗോളും പിറന്നു. ലാല്‍റാംചുല്ലോവയുടെ വകയായിരുന്നു മൂന്നാമത്തെ ഗോള്‍. അവസാന വിസില്‍ വരെ ഗോകുലം പൊരുതി നോക്കിയെങ്കിലും പിന്നീടൊരു ഗോള്‍ കണ്ടെത്താന്‍ ഗോകുലത്തിനായില്ല.
ജയത്തോടെ ആറ് മത്സരത്തില്‍ നിന്ന് ഒന്‍പത് പോയിന്റുമായി ഈസ്റ്റ് ബംഗാള്‍ ആറാം സ്ഥാനത്തെത്തി. ഗോകുലം ഏഴാം സ്ഥാനത്തേക്ക് പിന്തള്ളപ്പെട്ടു. 15ന് റിയല്‍ കശ്മിരുമായി കോഴിക്കോട് കോര്‍പ്പറേഷന്‍ സ്റ്റേഡിയത്തിലാണ് ഗോകുലത്തിന്റെ അടുത്ത മത്സരം. ഇന്ന് നടക്കുന്ന മത്സരത്തില്‍ ചര്‍ച്ചില്‍ ബ്രദേഴ്‌സ് ഐസ്വാള്‍ എഫ്.സിയെ നേരിടും.