ന്യൂഡല്‍ഹി: ശബരിമല യുവതീപ്രവേശനവുമായി ബന്ധപ്പെട്ട വിഷയം ഗൗരവമുള്ളതാണെന്നും വിശാല ബെഞ്ചിന്റെ വിധി വരുന്നതുവരെ കാത്തിരിക്കണമെന്നും സുപ്രിംകോടതി. ശബരിമലയിലേക്ക് പോകാന്‍ സുരക്ഷ ആവശ്യപ്പെട്ടുള്ള രഹ്ന മനോജിന്റെയും ബിന്ദു അമ്മിണിയുടേയും ഹരജികളിലാണ് ചീഫ് ജസ്റ്റിസിന്റെ പരാമര്‍ശം.

ശബരിമലയില്‍ ആക്രമം ആഗ്രഹിക്കുന്നില്ല. ക്രമസമാധാനനില പരിഗണിക്കണം. യുവതീ പ്രവേശനം വിശാല ബെഞ്ച് പരിഗണിക്കട്ടെ, അതുവരെ സമാധാനപരമായി ഇരിക്കൂ എന്നും സുപ്രിംകോടതി ഹരജിക്കാരോട് ആവശ്യപ്പെട്ടു. പ്രശ്‌നങ്ങള്‍ ഇല്ലാതെ പോകാന്‍ കഴിയുമെങ്കില്‍ പൊയ്‌കോളൂ. പൊലിസ് സംരക്ഷണത്തോടെ പോകാന്‍ സാധിക്കില്ലെന്നും ചീഫ് ജസ്റ്റിസ് വ്യക്തമാക്കി.

യുവതീപ്രവേശന വിധി നടപ്പാക്കാന്‍ സംസ്ഥാന സര്‍ക്കാരിന് നിര്‍ദ്ദേശം നല്‍കണമെന്ന് ആവശ്യപ്പെട്ട് ബിന്ദു അമ്മിണിയും ദര്‍ശനത്തിന് സുരക്ഷ ഉറപ്പാക്കാന്‍ സംസ്ഥാന സര്‍ക്കാരിന് നിര്‍ദ്ദേശം നല്‍കണമെന്ന് ആവശ്യപ്പെട്ട് രഹ്ന മനോജും നല്‍കിയ ഹരജികളാണ് ഇന്ന് സുപ്രിംകോടതി പരിഗണിച്ചത്. ീഫ് ജസ്റ്റിസ് എസ്എ. ബോബ്‌ഡെ ജസ്റ്റിസുമാരായ സുര്യകാന്ത്, ബി ആര്‍ ഗവായ് എന്നിവരടങ്ങിയ ബഞ്ചാണ് ഹരജി പരിഗണിച്ചത്.