ബാസിത് ഹസന്‍#

തൊടുപുഴ: ഡാം സുരക്ഷയുടെ ഭാഗമായി വൈദ്യുതി ബോര്‍ഡ് സമര്‍പ്പിച്ച 136 കോടി രൂപയുടെ പദ്ധതി ലോക ബാങ്ക് തള്ളി. സംസ്ഥാനത്തെ പ്രധാന അണക്കെട്ടുകളില്‍ സി.സി.ടി.വി കാമറകള്‍ സ്ഥാപിക്കാനുള്ള പദ്ധതിയാണ് മാനദണ്ഡത്തിന് വിരുദ്ധമാണെന്ന കാരണത്താല്‍ ലോക ബാങ്ക് തള്ളിയത്.
ലോക ബാങ്ക് പദ്ധതിയായ ഡ്രിപ്പില്‍ (ഡാം റീഹാബിലിറ്റേഷന്‍ ആന്‍ഡ് ഇംപ്രൂവ്‌മെന്റ് പ്രൊജക്ട്) ഉള്‍പ്പെടുത്തി ഇടുക്കിയടക്കം 18 അണക്കെട്ടുകളില്‍ 179 സി.സി.ടി.വി കാമറകള്‍ സ്ഥാപിച്ച് സുരക്ഷ ശക്തമാക്കാനായിരുന്നു കെ.എസ്.ഇ.ബിയുടെ പദ്ധതി. ഇതിനായി ടെണ്ടര്‍ ക്ഷണിച്ച് നടപടിക്രമങ്ങള്‍ മുന്‍പോട്ടു പോയിരുന്നു.
ഇ.എം.ഡി എക്‌സംഷനുമായി ബന്ധപ്പെട്ടാണ് പ്രശ്‌നമുണ്ടായതെന്നും മാനദണ്ഡങ്ങളില്‍ മാറ്റംവരുത്തി പദ്ധതി റീടെണ്ടര്‍ ചെയ്യാനുള്ള ശ്രമത്തിലാണെന്നും ഡ്രിപ്പ് ആന്‍ഡ് ഡാം സേഫ്റ്റി ചീഫ് എന്‍ജിനീയര്‍ ബിബിന്‍ ജോസഫ് സുപ്രഭാതത്തോട് പറഞ്ഞു.
അണക്കെട്ടുകളില്‍ സി.സി.ടി.വി കാമറകള്‍ സ്ഥാപിക്കാന്‍ 2017 മെയ് 29നാണ് കെ.എസ്.ഇ.ബി ടെണ്ടര്‍ ക്ഷണിച്ചത്. കാമറകളുടെ സാങ്കേതിക മാനദണ്ഡങ്ങള്‍ സംബന്ധിച്ച് പ്രീ ബിഡ് വേളയില്‍ തന്നെ ഗുരുതര ആക്ഷേപങ്ങള്‍ ഉയര്‍ന്നിരുന്നു.
ഒരു കമ്പനിക്കുവേണ്ടി മാത്രം ഉണ്ടാക്കിയ മാനദണ്ഡമാണെന്നും ഇതില്‍ വന്‍ അഴിമതിയുണ്ടെന്നുമായിരുന്നു ആരോപണം. ഇതുസംബന്ധിച്ച് ടെണ്ടറില്‍ പങ്കെടുത്ത തിരുവനന്തപുരം ആസ്ഥാനമായുള്ള യുനൈറ്റഡ് ടെലിക്കോം ലിമിറ്റഡ് എന്ന സ്ഥാപനം ചീഫ് എന്‍ജിനീയര്‍ക്ക് പരാതി നല്‍കിയിരുന്നു.
നിലവില്‍ സുരക്ഷയുമായി ബന്ധപ്പെട്ട് ഏറ്റവും അടിസ്ഥാനപരമായ കാര്യമാണ് സി.സി.ടി.വി കാമറകള്‍. സംസ്ഥാനത്തെ കെ.എസ്.ഇ.ബി അണക്കെട്ടുകളില്‍ ഭൂരിഭാഗവും സ്ഥിതിചെയ്യുന്നത് വന മേഖലകളിലോ ഒറ്റപ്പെട്ട പ്രദേശങ്ങളിലോ ആണ്. രാജ്യത്തെ അണക്കെട്ടുകള്‍ക്കുനേരെ ആക്രമണം നടത്താന്‍ ഭീകരസംഘടനകള്‍ പദ്ധതിയിടുന്നതായി കേന്ദ്ര ഇന്റലിജന്‍സ് ബ്യൂറോയുടെ മുന്നറിയിപ്പ് നിലനില്‍ക്കുന്നുണ്ട്. രാജ്യത്ത് സുരക്ഷാഭീഷണിയുള്ള ആറ് കേന്ദ്രങ്ങളില്‍ ഒന്ന് ഇടുക്കി അണക്കെട്ടാണെന്നും റിപ്പോര്‍ട്ടുണ്ട്.
പുതിയ സാഹചര്യത്തില്‍ സി.സി.ടി.വി കാമറകള്‍ സ്വന്തം നിലയില്‍ സ്ഥാപിക്കാന്‍ കഴിയുമോയെന്നത് സംബന്ധിച്ചും കെ.എസ്.ഇ.ബി പരിശോധിക്കുന്നുണ്ട്. എന്നാല്‍ കെ.എസ്.ഇ.ബി ജനറേഷന്‍ വിഭാഗം പവര്‍ ഹൗസുകളില്‍ സ്വന്തം നിലയില്‍ സി.സി.ടി.വി കാമറകള്‍ സ്ഥാപിക്കുന്നുണ്ട്.
ലോവര്‍ പെരിയാര്‍ പവര്‍ ഹൗസില്‍ കാമറകള്‍ സ്ഥാപിക്കാന്‍ 28.41 ലക്ഷം രൂപയുടെ ടെണ്ടര്‍ കോതമംഗലം ജനറേഷന്‍ സര്‍ക്കിള്‍ ഡെപ്യൂട്ടി ചീഫ് എന്‍ജിനീയര്‍ കഴിഞ്ഞ ദിവസം ക്ഷണിച്ചിരുന്നു.