കൊച്ചി: ജില്ലാ ആയൂര്‍വേദ ആശുപത്രിയുടെ വികസനം വഴിമുട്ടിയതായി ആശുപത്രി സംരക്ഷണ സമിതി ഭാരവാഹികള്‍ വാര്‍ത്താസമ്മേളനത്തില്‍ പറഞ്ഞു. ആയുര്‍വേദ ആശുപത്രി ജില്ലാ പഞ്ചായത്തിന്റെ കീഴിലാണെങ്കിലും അധികൃതര്‍ തിരിഞ്ഞുനോക്കുന്നില്ല. ഭാവി വികസനം അട്ടിമറിക്കുന്നവിധം ആശുപത്രി വളപ്പില്‍ പുതുതായി ജില്ലാ മെഡിക്കല്‍ ഓഫിസ് നിര്‍മിക്കാനൊരുങ്ങുകയാണെന്നും സമിതി ജനറല്‍ സെക്രട്ടറി പള്ളുരുത്തി സുബൈര്‍ പറഞ്ഞു.
കൊച്ചി മെട്രോയ്ക്കായി ഏഴ് സെന്റ് സ്ഥലം വിട്ടുനല്‍കിയെങ്കിലും നഷ്ടപരിഹാരത്തുക വാങ്ങിയെടുക്കാന്‍ കഴിഞ്ഞില്ല. മൂന്ന് ബ്ലോക്കും 400 കിടക്കകളും ചികിത്സയും ഒരുക്കുന്നതിനുള്ള പദ്ധതിയായിരുന്നു ആവിഷ്‌കരിച്ചത്. ആദ്യ ബ്ലോക്കിന്റെ നിര്‍മാണം പൂര്‍ത്തിയായിട്ടും മറ്റ് ബ്ലോക്കുകള്‍ ഉപേക്ഷിച്ചു. രോഗികള്‍ക്ക് നിലവിലെ ബ്ലോക്കിലെ മുകള്‍ നിലയിലേക്ക് കയറാന്‍ ലിഫ്റ്റില്ല. ഇതിന് ഫണ്ട് അനുവദിച്ചുവെന്ന് പറയുന്നുണ്ടെങ്കിലും നടപടിയായിട്ടില്ല. ഇക്കാര്യത്തിലും ജില്ലാ പഞ്ചായത്ത് അലംഭാവം കാണിക്കുകയാണ്.
50 കിടക്കകള്‍ മാത്രമുള്ള പരിമിതമായ സൗകര്യമാണിപ്പോഴുള്ളത്. 1.20 ഏക്കര്‍ സ്ഥലമുണ്ടായിരുന്ന ആശുപത്രിക്ക് നേരത്തെ ഖാദി ഭവനായി 20 സെന്റ് നല്‍കി. ഇതിനിടെയാണ് ഡി.എം.ഒ ഓഫീസ് നിര്‍മിക്കാന്‍ നീക്കം നടക്കുന്നത്. നിലവിലെ മാസ്റ്റര്‍ പ്ലാനില്‍തന്നെ ജില്ലാ ആയൂര്‍വേദ ഓഫീസ് പ്രവര്‍ത്തിപ്പിക്കാനാവും വിധമാണ് തയ്യാറാക്കിയിട്ടുള്ളത്. വളപ്പിനുള്ളില്‍ പുതിയ കെട്ടിടം നിര്‍മിക്കുന്നതോടെ പുതിയ ബ്ലോക്ക് നിര്‍മാണം തടയപ്പെടും. ആശുപത്രി വികസനത്തിന് നടപടിയെടുക്കണമെന്നാവശ്യപ്പെട്ട് മുഖ്യമന്ത്രിക്കും ആരോഗ്യമന്ത്രിക്കും നിവേദനം നല്‍കിയെന്നും സമിതി ഭാരവാഹികള്‍ പറഞ്ഞു. സമിതി പ്രസിഡന്റ് എ.കെ പുതുശേരി, വൈസ് പ്രസിഡന്റ് പി.കെ സിറിള്‍, സെക്രട്ടറി എം.ജി ഗിരീഷ്‌കുമാര്‍ എന്നിവരും വാര്‍ത്താസമ്മേളനത്തില്‍ പങ്കെടുത്തു.