പാലക്കാട്: എലപ്പുള്ളി ഗ്രാമപഞ്ചായത്ത് പ്ലാസ്റ്റിക് വിമുക്തമാക്കാന്‍ പുതിയ പദ്ധതി നടപ്പാക്കുന്നു. ഗ്രാമപഞ്ചായത്തിന്റെ നേതൃത്വത്തില്‍ ഖരമാലിന്യ പ്ലാന്റ് നിര്‍മാണം പൂര്‍ത്തിയാവുന്നതോടെ പഞ്ചായത്ത് പൂര്‍ണമായും പ്ലാസ്റ്റിക് വിമുക്തമാകുമെന്ന് ഗ്രാമപഞ്ചായത്ത് പ്രസിഡന്റ് എ.തങ്കമണി പറഞ്ഞു.
പദ്ധതിയുടെ ആദ്യഘട്ടമായി 12 ലക്ഷം രൂപ ചെലവില്‍ ഖരമാലിന്യ പ്ലാന്റ് സ്ഥാപിക്കാനുള്ള കെട്ടിടനിര്‍മാണം ആരംഭിച്ചു കഴിഞ്ഞു. പഞ്ചായത്തിന്റെ സ്വന്തം സ്ഥലത്താണ് കെട്ടിടം നിര്‍മിക്കുന്നത്. 1100 ചതുരശ്രയടി വിസ്തീര്‍ണത്തില്‍ പൂര്‍ത്തിയാവുന്ന പ്ലാന്റില്‍ പ്രധാനമായും രണ്ട് മെഷീനുകളാണ് സ്ഥാപിക്കുന്നത്.
പ്ലാസ്റ്റിക് മാലിന്യം പൊടിക്കുന്ന മെഷീന് എട്ട് ലക്ഷവും ഇവ കട്ടകളാക്കി മാറ്റുന്നതിനുള്ള മെഷീന് 13 ലക്ഷവും കണക്കാക്കി എസ്റ്റിമേറ്റ് തയാറാക്കിക്കഴിഞ്ഞു. മാലിന്യ പ്ലാന്റില്‍ നിന്ന് പൊടിച്ച് ലഭിക്കുന്ന പ്ലാസ്റ്റിക്കുകള്‍ റോഡ് നിര്‍മാണത്തിനായി ടാറില്‍ ചേര്‍ക്കാനും മറ്റുള്ളവ റീസൈക്ലിങിനുള്ള പ്ലാസ്റ്റിക് കേന്ദ്രങ്ങള്‍ക്ക് നല്‍കാനുമാണ് പഞ്ചായത്ത് പദ്ധതിയിട്ടിരിക്കുന്നത്.  പഞ്ചായത്ത് പരിധിയിലെ വീടുകളിലെ പ്ലാസ്റ്റിക് മാലിന്യശേഖരണത്തിന് ഗാന്ധിജയന്തി ദിനത്തില്‍ തുടക്കം കുറിച്ചിരുന്നു. വിവിധതരം മാലിന്യങ്ങള്‍ വേര്‍തിരിച്ച് വൃത്തിയാക്കി പ്ലാസ്റ്റിക് മാലിന്യം ശേഖരിക്കുന്നതെങ്ങനെയെന്ന് ഓരോ വീട്ടിലും നോട്ടീസ് നല്‍കിയിട്ടുണ്ട്. ഗ്രാമപഞ്ചായത്തിലെ 22 വാര്‍ഡുകളിലും ശുചിത്വമിഷന് കീഴിലുള്ള രണ്ട് ശുചീകരണ തൊഴിലാളികള്‍ വീതം ദിവസവും വീടുകളിലെത്തി പ്ലാസ്റ്റിക് മാലിന്യം ശേഖരിച്ച് വരുന്നു. 22 വാര്‍ഡുകളിലും ശുചിത്വ സമിതിയും രൂപീകരിച്ചിട്ടുണ്ട്. ഓരോ വീടുകളില്‍ നിന്നും 20 രൂപ വീതം ഫീസായി ഈടാക്കുന്നുണ്ട്. 2019 മാര്‍ച്ചോടുകൂടി ഖരമാലിന്യ സംസ്‌കരണ പ്ലാന്റ് പ്രവര്‍ത്തിച്ച് തുടങ്ങുമെന്ന് ഗ്രാമപഞ്ചായത്ത് അധികൃതര്‍ പറഞ്ഞു.