തേഞ്ഞിപ്പലം: വെല്ലൂരില്‍ നടന്ന ദക്ഷിണമേഖലാ അന്തര്‍ സര്‍വകലാശാല ഫുട്‌ബോളില്‍ കാലിക്കറ്റ് സര്‍വകലാശാല ജേതാക്കളായി. തുടര്‍ച്ചയായ നാലാം തവണയാണ് കാലിക്കറ്റ് സര്‍വകലാശാല ദക്ഷിണ മേഖലാ ഫുട്‌ബോള്‍ ചാംപ്യന്‍ഷിപ്പില്‍ കിരീടം സ്വന്തമാക്കുന്നത്. ലീഗ് റൗണ്ട് മത്സരങ്ങളില്‍ രണ്ട് ജയവും ഒരു സമനിലയുമായി ഏഴ് പോയിന്റോടെയാണ് കിരീടം നേടിയത്. ലീഗ് റൗണ്ടിലെ അവസാന മത്സരത്തില്‍ എസ്.ആര്‍.എം സര്‍വകലാശാലയെ രണ്ട് ഗോളുകള്‍ക്ക് പരാജയപ്പെടുത്തി. കാലിക്കറ്റിന് വേണ്ടി ബിബിന്‍ ഫ്രാന്‍സിസ് 66-ാം മിനുട്ടിലും, നിസാം 86-ാം മിനുട്ടിലും ഗോളുകള്‍ നേടുകയായിരുന്നു. കണ്ണൂര്‍ യൂണിവേഴ്‌സിറ്റി രണ്ടും എസ്.ആര്‍.എം ചെന്നൈ മൂന്നും കേരള സര്‍വകലാശാല നാലും സ്ഥാനങ്ങള്‍ നേടി. ഡിസംബര്‍ 31മുതല്‍ ജലന്തറില്‍ വെച്ചാണ് അഖിലേന്ത്യ മത്സരം. മുന്‍ സന്തോഷ് ട്രോഫി പരിശീലകനായ പി.കെ രാജീവാണ് ടീം പരിശീലകന്‍. കൊണ്ടോട്ടി ഇ.എം.ഇ.എ കോളജിലെ ടി സുഹൈല്‍ ക്യാപ്റ്റനും ഫാറൂഖ് കോളജ് വിദ്യാര്‍ഥി മുഹമ്മദ് മന്‍ഹല്‍ വൈസ് ക്യാപ്റ്റനുമാണ്.