ആലപ്പുഴ: ഐ.എസ് ബന്ധമാരോപിച്ച് ആലപ്പുഴ സ്വദേശിയായ യുവാവിനെ എന്‍.ഐ.എ സംഘം കസ്റ്റഡിയിലെടുത്തു. ആലപ്പുഴ കിടങ്ങാംപറമ്പ് സ്വദേശിയായ ബാസില്‍ ശിഹാബി (25) നെയാണ് വ്യാഴാഴ്ച രാത്രി വീട്ടില്‍നിന്ന് കസ്റ്റഡിലെടുത്തത്.
വ്യാഴാഴ്ച വൈകിട്ട് ആറ് മണിയോടെ യുവാവിന്റെ വീട്ടിലെത്തിയ സംഘം വിശദമായി ചോദ്യം ചെയ്തശേഷമാണ് രാത്രി പത്തോടെ കസ്റ്റഡിയിലെടുത്തത്. കൊച്ചിയിലെ എന്‍.ഐ.എ ആസ്ഥാനത്തെത്തിച്ച് വിശദമായ ചോദ്യം ചെയ്യല്‍ തുടരുകയാണ്.
കഴിഞ്ഞ ദിവസം തമിഴ്‌നാട്ടില്‍നിന്ന് ഐ.എസ് ബന്ധമുള്ള രണ്ട് പേര്‍ അറസ്റ്റിലായിരുന്നു. ഇവരുമായി ബന്ധപ്പെടുത്തിയാണ് യുവാവിനെ കസ്റ്റഡിയിലെടുത്തത്.
ഇയാള്‍ ഇസ്‌ലാമിക് സ്റ്റേറ്റിന്റെ ഫേസ് ബുക്ക് പേജില്‍ കമന്റിടുകയും ഫേസ്ബുക്ക് ലിങ്ക് ഉപയോഗിച്ചതായും കണ്ടെത്തിയിട്ടുണ്ട്.
അതേസമയം തന്റെ മകന്‍ കുറ്റമൊന്നും ചെയ്തിട്ടില്ലെന്ന് യുവാവിന്റെ മാതാവ് പറഞ്ഞു.
മാതാവും സഹോദരിയും മാതാവിന്റെ അമ്മയും മാത്രമാണ് വീട്ടിലുള്ളത്. പിതാവ് വിദേശത്താണ്. നാഗര്‍കോവിലില്‍ നിന്ന് ബി.ടെക് പൂര്‍ത്തിയാക്കിയ യുവാവ് എറണാകുളം വൈറ്റിലയിലെ സ്വകാര്യ കമ്പനിയില്‍ ട്രെയിനിയാണ്.