മദീന: കേരള ജംഇയ്യതുൽ മുഅല്ലിമീൻ 60-ാം വാർഷിക സമ്മേളനത്തിൽ ഉയർത്താനുള്ള പതാക മദീനയിൽ നിന്നും തിരിച്ചു. സമ്മേളന നഗരിയിൽ ഉയർത്താനുള്ള പതാക മദീനയിലെ റൗള ഷെരീഫ് സിയാറത്തിന് ശേഷം ഓമാനൂർ അബ്ദു റഹ്മാൻ മൗലവിയുടെ നേതൃത്വത്തിലാണ് നാട്ടിലെത്തിക്കുന്നത്. മദീന സിയാറത്തിന് ശേഷം മദീന ഇസ്‌ലാമിക് സെന്റർ ഓഡിറ്റോറിയത്തിൽ നടന്ന യാത്രയയപ്പ് സംഗമത്തിൽ സമസ്‌ത, എസ് ഐ സി നേതാക്കൾ സന്നിഹിതരായിരുന്നു.

         യാത്രയയപ്പ് സമ്മേളനത്തിൽ അഹമ്മദ് കുട്ടി ഫൈസി ഓമാനൂർ അധ്യക്ഷത വഹിച്ചു. സമസ്‌ത കേരള ജംഇയ്യത്തുൽ ഉലമ മലപ്പുറം ജില്ല ജനറൽ സെക്രട്ടരി പുത്തനഴി മൊയ്‌ദീൻ ഫൈസി ഉദ്ഘാടനം ചെയ്‌തു. ടിഎച്ച് ദാരിമി പ്രമേയ പ്രഭാഷണം നടത്തി. അബൂബക്കർ ദാരിമി താമരശ്ശേരി, അസൈനാർ ഫറോക്ക്, സുലൈമാൻ പണിക്കരപ്പുറായ, സലീം മണ്ണാർക്കാട്, ജുനൈദ് മാസ്റ്റർ കൊടുവള്ളി, നഫ്‌സൽ വാഴക്കാട് സംസാരിച്ചു. ചൊവ്വാഴ്ച പുലർച്ചെ 2:2 0 ന് ജിദ്ധയിൽ നിന്ന് പുറപ്പെടുന്ന സഊദി എയർലൈൻസ് വിമാനത്തിൽ കാലത്ത് 10.10 ന് കരിപ്പൂരിലെത്തും. ഇവിടെ നിന്നും സ്വീകരിച്ച് നിരവധി വാഹനങ്ങളുടെ അകമ്പടിയോടെ ചേളാരി സമസ്‌താലയത്തിലേക്ക് ആനയിക്കും. ഇതോടൊപ്പം ഒമാനിലെ സലാലയിൽ നിന്നുൾപ്പെടെയുള്ള അറുപത് മഖാമുകളിൽ നിന്നെത്തുന്ന പതാക ചേളാരിയിൽ നിന്നും 25 ന് പതാക ജാഥയുമായി സമ്മേളനം നടക്കുന്ന കൊല്ലത്ത് എത്തിക്കും.