പുതുക്കാട്: പാലപ്പിള്ളി എച്ചിപ്പാറയില്‍ പുലിയിറങ്ങി പോത്തിനെ കൊന്നു. പാലപ്പിള്ളി സ്വദേശി വര്‍ഗീസിന്റെ പോത്തിനെയാണ് പുലി പിടിച്ചത്.
ചിമ്മിനി ഡാം റോഡിനോട് ചേര്‍ന്ന് 10 മീറ്റര്‍ അകലെയാണ് പുലിയിറങ്ങിയത്. നാലു മാസം മുന്‍പ് ഇവിടെ പുലിയിറങ്ങി പശുവിനെ കൊന്നിരുന്നു. ജനവാസ മേഖലയില്‍ പുലിയിറങ്ങിയതോടെ നാട്ടുകാര്‍ ഭീതിയിലാണ്. അഞ്ചു മാസത്തിനിടെ മൂന്നാം തവണയാണ് പുലിയിറങ്ങി വളര്‍ത്തുമൃഗങ്ങളെ കൊല്ലുന്നത്. പാലപ്പിള്ളി റബ്ബര്‍ തോട്ടങ്ങളിലെ അടിക്കാട് വെട്ടാത്തതുമൂലം ഇവിടങ്ങളില്‍ വന്യമൃഗങ്ങളുടെ ശല്യം പെരുകുകയാണ്. ജനവാസ കേന്ദ്രങ്ങളില്‍ വന്യമൃഗങ്ങള്‍ ഇറങ്ങാതിരിക്കാന്‍ വനാതിര്‍ത്തിയില്‍ വൈദ്യുതവേലി സ്ഥാപിക്കണമെന്ന് നാട്ടുകാര്‍ ആവശ്യപ്പെട്ടു.