യു.എച്ച് സിദ്ദീഖ്#

കോഴിക്കോട്: വിവാദങ്ങള്‍ക്ക് പിന്നാലെ കേരള ഗോകുലം എഫ്.സിയും റിയല്‍ കശ്മിരും ഇന്ന് കളിക്കളത്തിലേക്ക്. മുന്‍ ചാംപ്യന്മാരെ അട്ടിമറിച്ചതിന്റെ ആത്മവിശ്വാസവുമായി റിയലും വിജയതീരത്തേക്ക് തിരിച്ചെത്താനുള്ള തയാറെടുപ്പുമായി ഗോകുലവും കളത്തിലിറങ്ങുമ്പോള്‍ പോരാട്ടത്തിന് വീര്യമേറും. ഏഴ് കളികള്‍ പൂര്‍ത്തിയാക്കിയ ഗോകുലം രണ്ട് ജയവും മൂന്ന് സമനിലയും രണ്ട് തോല്‍വിയുമായി ലീഗില്‍ ഏഴാം സ്ഥാനത്താണ്. റിയലിനെ ഇന്ന് കീഴടക്കി ലീഗില്‍ കുതിപ്പു തുടരേണ്ടത് ഗോകുലത്തിന് അനിവാര്യം. തുടര്‍ച്ചായ രണ്ടു ജയത്തിനും സമനിലയ്ക്കും ശേഷം കഴിഞ്ഞ കളിയില്‍ ഈസ്റ്റ് ബംഗാളിനോട് 3-1 ന് തോല്‍വി വഴങ്ങേണ്ടി വന്നതിന്റെ ക്ഷീണം മറികടക്കാന്‍ ഗോകുലത്തിന് ജയിച്ചേ മതിയാവു. ക്രിസ്റ്റ്യന്‍ സാബയും എസ്. രാജേഷും മികവ് പുലര്‍ത്തുന്നത് ഗോകുലത്തിന്റെ വിജയ പ്രതീക്ഷ വര്‍ധിപ്പിക്കുന്നു. ടീം വിട്ട അന്റോണിയോ ജര്‍മന് പകരം വിദേശ സ്‌ട്രൈക്കര്‍ കൂടി ഇന്ന് ടീമിനൊപ്പം ചേരുന്നതോടെ ശക്തി വര്‍ധിക്കും. വായ്പ അടിസ്ഥാനത്തിലാണ് വിദേശ സ്‌ട്രൈക്കര്‍ ഗോകുലത്തില്‍ എത്തുന്നത്. ശ്രീനഗറിലെ തണുപ്പില്‍നിന്ന് കോഴിക്കോട്ടെ 35 ഡിഗ്രി ചൂടിലേക്കാണ് റിയല്‍ കളിക്കാനിറങ്ങുന്നത്. ലീഗില്‍ ഏഴ് മത്സരങ്ങള്‍ പൂര്‍ത്തിയാക്കിയ റിയല്‍ നാല് വിജയവും ഒരു സമനിലയും രണ്ടു തോല്‍വിയുമായി 13 പോയിന്റോടെ മൂന്നാം സ്ഥാനത്താണ്. വിശ്രമമില്ലാതെ മത്സരങ്ങള്‍ തുടര്‍ച്ചയായി കളിക്കേണ്ടി വന്നതിന്റെ ക്ഷീണമുണ്ട്. എങ്കിലും കോഴിക്കോട്ട് ഗോകുലത്തെ കീഴടക്കാമെന്ന ആത്മവിശ്വാസത്തിലാണ് റിയല്‍. കരുത്ത് ചോരാത്ത പ്രതിരോധമാണ് റിയലിന്റെ ശക്തി. നൈജീരിയന്‍ ഡിഫന്‍ഡര്‍ ലവ്‌ഡേ ഒക്കേച്ചുക്കു നയിക്കുന്ന പ്രതിരോധത്തെ മറികടക്കാന്‍ ഗോകുലം സ്‌ട്രൈക്കര്‍മാര്‍ക്ക് നന്നായി വിയര്‍പ്പൊഴുക്കേണ്ടി വരും.