ഛണ്ഡിഗഡ്: ഹരിയാന ബി.ജെ.പി അധ്യക്ഷന്‍ സുഭാഷ് ബറാലയുടെ മകന്‍ വികാസ് ബറാല ഐ.എ.എസ് ഓഫീസറുടെ മകളെ അപമാനിക്കാന്‍ ശ്രമിച്ച സംഭവത്തിന്റെ സിസിടിവി ദൃശ്യങ്ങള്‍ കാണാനില്ലെന്ന് പൊലിസ്. സംഭവവുമായി ബന്ധപ്പെട്ട് അഞ്ചു സിസിടിവികളില്‍ നിന്നുള്ള ദൃശ്യങ്ങളാണ് അപ്രത്യക്ഷമായതെന്ന് പൊലിസ് പറഞ്ഞു.

അതിനിടെ, രാത്രി വൈകി പെണ്‍കുട്ടി പുറത്തിറങ്ങിയതാണ് ഇത്തരമൊരു അനുഭവത്തിന് കാരണമെന്ന വിശദീകരവുമായി ബി.ജെ.പി സംസ്ഥാന സമിതി രംഗത്തെത്തി. രാത്രി 12 മണിക്കു ശേഷം പെണ്‍കുട്ടികള്‍ പുറത്തിറങ്ങരുതെന്നും പാര്‍ട്ടിയുടെ സംസഥാന ഉപാധ്യക്ഷന്‍ രാംവീര്‍ ഭാട്ടി പറഞ്ഞു. രാജ്യത്തെ സാഹചര്യങ്ങള്‍ മോശമാണെന്നും പെണ്‍കുട്ടികള്‍ സൂക്ഷിക്കുന്നത് നല്ലതാണെന്നും അദ്ദേഹം ന്യൂസ് 18നോട് പറഞ്ഞു.

ഹരിയാന കേഡറിലെ ഒരു മുതിര്‍ന്ന ഐ.എ.എസ് ഓഫീസറിന്റെ മകളാണ് പരാതിക്കാരി. ഫേസ്ബുക്കിലൂടെയാണ് പെണ്‍കുട്ടി തനിക്കുണ്ടായ ദുരനുഭവം സുഹൃത്തുക്കളുമായി പങ്കുവച്ചത്. വെള്ളിയാഴ്ച രാത്രി ഏകദേശം 12.15 ഓടുകൂടിയാണ് സംഭവം നടന്നത്. പെണ്‍കുട്ടി മാത്രമാണ് കാറില്‍ ഉണ്ടായിരുന്നത്. ഛണ്ഡിഗഡിലെ സെക്ടര്‍ 8 നിന്നും പഞ്ച്കുള ടൗണിലേക്ക് കാറില്‍ പേയ പെണ്‍കുട്ടിയെ എസ്യുവില്‍ എത്തിയ പ്രതികള്‍ സെക്ടര്‍ 7 ഏരിയ മുതല്‍ പിന്തുടരുകയായിരുന്നു. വാഹനത്തില്‍ പിന്തുടര്‍ന്നവര്‍ അനവധി തവണ പെണ്‍കുട്ടിയുടെ വാഹനത്തില്‍ ഇടിക്കാന്‍ ശ്രമിക്കുകയും ഭയപ്പെടുത്താന്‍ ശ്രമിക്കുകയും ചെയ്തു.

ഒരു ഘട്ടത്തില്‍ പെണ്‍കുട്ടിയുടെ വാഹനത്തിന്റെ മുന്നിലേക്ക് കയറി വഴി തടഞ്ഞ് അവളെ വേറെ റൂട്ടിലേക്ക് വഴി തിരിച്ചു വിടാനും ഇവര്‍ ശ്രമിച്ചു. പെണ്‍കുട്ടി വാഹനം നിര്‍ത്തിയപ്പോള്‍ അക്രമികള്‍ വാഹനത്തില്‍ നിന്നിറങ്ങി പെണ്‍കുട്ടിയുടെ വാഹനത്തിനടുത്തേക്ക് നടന്നു തുടങ്ങി. ഈ അവസരം മുതലാക്കിയ പെണ്‍കുട്ടി ഉടന്‍ തന്നെ വാഹനം പിന്നോട്ടെടുത്ത് അതിവേഗം അവിടെ നിന്നും ഓടിച്ചു പോയി. പിന്നെയും കുറെ ദൂരം അവര്‍ തന്റെ വാഹത്തെ പിന്തുടര്‍ന്നതായി പെണ്‍കുട്ടിയുടെ ഫേസ്ബുക്ക് പോസ്റ്റില്‍ പറയുന്നു.

കേസില്‍ അറസ്റ്റിലായ വികാസിനെയും സുഹൃത്തിനെയും പൊലിസ് ജാമ്യം നല്‍കി വിട്ടയച്ചിരുന്നു.