മണ്ണാര്‍ക്കാട്: ഷോളയൂര്‍ കോഴിക്കൂടത്ത് മണ്ണാര്‍ക്കാട് എക്‌സൈസ് സര്‍ക്കിള്‍ ഇന്‍സ്‌പെക്ടറുടെ നേതൃത്വത്തില്‍ നടത്തിയ പരിശോധനയില്‍ കഞ്ചാവ് ചെടികള്‍ പിടികൂടി. കോഴിക്കൂടം ഇരട്ടപ്പാലം നെട്ടുമ്പള്ളിയില്‍ രതീഷിന്റെ കൃഷി സ്ഥലത്തു നിന്നാണ് കഞ്ചാവു ചെടികള്‍ പിടിച്ചെടുത്തത്. നാല് മീറ്റര്‍ ഉയരത്തില്‍ വിളവെടുക്കാന്‍ പാകത്തിലായിരുന്നു ചെടികള്‍. മറ്റ് കൃഷികള്‍ക്കിടിയിലാണ് കഞ്ചാവ് കൃഷി ചെയ്തിരുന്നത്. കഞ്ചാവ് ചെടികള്‍ക്ക് നന്നായി പരിചരിക്കുന്ന വിധമായിരുന്നു.
പിടികൂടിയ ചെടികളില്‍ നിന്ന് ഏകദേശം 50 കിലോ കഞ്ചാവ് ലഭിക്കുമെന്നും വിപണിയില്‍ 50 ലക്ഷം രൂപ വില ലഭിക്കുമെന്നും എക്‌സൈസ് സംഘം പറഞ്ഞു. പ്രതിയെ പിടികൂടാനായില്ല. മണ്ണാര്‍ക്കാട് എക്‌സൈസ് സര്‍ക്കിള്‍ ഇന്‍സ്‌പെക്ടര്‍ ബി. ചന്ദ്രന്‍, എക്‌സൈസ് ഇന്‍സ്‌പെക്ടര്‍ പി. ഉമ്മര്‍, അഗളി റെയ്ഞ്ച് അസി.എക്‌സൈസ് ഇന്‍സ്‌പെക്ടര്‍ വി.കെ ശങ്കര്‍ പ്രസാദ്, പ്രിവന്റീവ് ഓഫിസര്‍മാരായ എസ്. ഷിബുകുമാര്‍, സി. രാജു, സിവില്‍ എക്‌സൈസ് ഓഫിസര്‍മാരായ വി.കെ. ബിജു, ജി. പ്രദീപ്കുമാര്‍, ഡ്രൈവര്‍ അനിരുദ്ധന്‍ എന്നിവരാണ് റെയ്ഡില്‍ പങ്കെടുത്തത്..