ആലപ്പുഴ: അനധികൃതമായി വിദേശമദ്യം കടത്തിയ ജവാന്‍ അറസ്റ്റില്‍.എക്‌സൈസ് കമ്മീഷനര്‍ക്ക് ലഭിച്ച രഹസ്യവിവരത്തെ തുടര്‍ന്ന് ആലപ്പുഴ എക്‌സൈസ് എന്‍ഫോഴ്‌മെന്റ് ആന്റ് ആന്റി നര്‍ക്കോട്ടിക്ക് സ്‌പെഷ്യല്‍ സ്‌ക്വാഡ് നടത്തിയ റെയ്ഡില്‍ ചെങ്ങന്നൂര്‍ റയില്‍വേസ്റ്റേഷന്റെ മുന്നില്‍ നിന്നാണ് ഇയാളെ അറസ്റ്റ്‌ചെയ്തത്. ജമ്മൂകാശ്മീരില്‍ ഗ്രഫില്‍ (ജനറല്‍ റിസേര്‍വ് എന്‍ജിനിയറിങ്ങ് ഫോഴ്‌സില്‍) ജോലിചെയ്യുന്ന പത്തനം തിട്ട റാന്നി താലൂക്കില്‍ റാന്നി വില്ലേജില്‍ ഉതിമുട്, പള്ളിക്കാലയില്‍ മനോജ്(39)ആണ് പിടിയിലായത്.
ഇയാള്‍ നാട്ടില്‍ അവധിക്ക് വരുന്ന സമയത്ത് അനുവദനീയമായ അളവില്‍ കൂടുതല്‍ വിദേശമദ്യം ക്യാന്റീനില്‍ നിന്നും പലപ്പൊഴായി വാങ്ങി ശേഖരിച്ച് നാട്ടില്‍ വിതരണം ചെയ്യുന്നുവെന്ന പാരാതിയെ തുടര്‍ന്നായിരുന്നു പരിശോധന നടത്തിയത്. ഓണത്തോട് അനുബന്ധിച്ചുള്ള ഉപയോഗത്തിനായി കൊണ്ടുവന്നതാണ് പിടിച്ചെടുത്ത മദ്യം. അപകടത്തെ തുടര്‍ന്ന് ഒരുകാല്‍പ്പാദം നഷ്ടപെട്ട ഇയാള്‍ പ്രത്യേക പരിഗണപ്രകാരമാണ് ഇപ്പോള്‍ ജോലിചെയ്ത് വരുന്നത്. അംഗപരിമതര്‍ക്കുള്ള പ്രത്യേക കണ്‍സഷന്‍ ഉപയോഗിച്ച് എ.സി കംപാര്‍ട്ട്‌മെന്റിലാണ് യാത്ര ചെയ്തിരുന്നത്. എക്‌സൈസ് സര്‍ക്കിള്‍ ഇന്‍സ്‌പെക്ടര്‍ കെ.ആര്‍ ബാബുവിന്റെ നേതൃത്വത്തില്‍ നടന്ന റെയിഡില്‍ പ്രിവന്റീവ് ഓഫീസറന്മാരായ എന്‍.ബാബു, എം.കെ സജിമോന്‍, സിവില്‍ എക്‌സൈസ് ഓഫീസറന്മാരായ എം.റെനി, ജിയേഷ്, വി.അരുണ്‍, ശരത്ത് ബാബു എന്നിവര്‍ പങ്കെടുത്തു.