പല്ലെക്കീല്‍: ശ്രീലങ്കക്കെതിരായ മൂന്നാം ക്രിക്കറ്റ് ടെസ്റ്റിനുള്ള ഇന്ത്യന്‍ ടീമിലേക്ക് ഇടം കൈയന്‍ സ്പിന്നറും ഓള്‍ റൗണ്ടറുമായ അക്‌സര്‍ പട്ടേലിനെ ഉള്‍പ്പെടുത്തി. രവീന്ദ്ര ജഡേജയ്ക്ക് ഒരു മത്സരത്തില്‍ നിന്ന് സസ്‌പെന്‍ഷന്‍ ലഭിച്ചതിനെ തുടര്‍ന്ന് താരത്തിന് പകരമാണ് അക്‌സറിനെ ടീമിലുള്‍പ്പെടുത്തിയത്.
അക്‌സര്‍ നടാടെയാണ് ഇന്ത്യന്‍ ടെസ്റ്റ് ടീമില്‍ അംഗമാകുന്നത്. 30 ഏകദിന മത്സരങ്ങളും ഏഴ് ടി20 മത്സരങ്ങളും ഇന്ത്യക്കായി കളിച്ച താരമാണ് 23 കാരനായ അക്‌സര്‍. കഴിഞ്ഞ ദിവസം അവസാനിച്ച ദക്ഷിണാഫ്രിക്കന്‍ എ ടീമിനെതിരായ ഏകദിന പരമ്പര നേട്ടത്തില്‍ ഇന്ത്യന്‍ എ ടീമിനായി താരം മികച്ച പ്രകടനം പുറത്തെടുത്തിരുന്നു.
പരമ്പരയിലെ മികച്ച മൂന്നാമത്തെ വിക്കറ്റ് വേട്ടക്കാരനും അക്‌സര്‍ തന്നെ. ഇടം കൈയന്‍ സ്പിന്നറും ഓള്‍ റൗണ്ടറുമായി ജഡേജയ്ക്ക് പകരം അതേ രീതി പിന്തുടരുന്ന താരത്തെ പകരമിറക്കുക എന്ന നയമാണ് സെലക്ടര്‍മാര്‍ സ്വീകരിച്ചത്. നിലവില്‍ ടീമിലുള്ള ഇടം കൈയന്‍ ചൈനാമെന്‍ ബൗളര്‍ കൂടിയായ കുല്‍ദീപ് യാദവ് നില്‍ക്കേ അക്‌സറിനെ ടീമിലുള്‍പ്പെടുത്തിയത് താരത്തിന്റെ ഓള്‍ റൗണ്ട് മികവ് ഉപയോഗപ്പെടുത്തുക ലക്ഷ്യമിട്ടാണെന്ന് വ്യക്തം.
മൂന്ന് ഡിമെറിറ്റ് പോയിന്റുകളുമായി ശ്രീലങ്കന്‍ പര്യടനത്തിനെത്തിയ ജഡേജ രണ്ടാം ടെസ്റ്റിനിടെ ലങ്കന്‍ താരം പുഷ്പകുമാരക്കെതിരേ അപകടകരമായ രീതിയില്‍ പന്തെറിഞ്ഞിരുന്നു. ഇതോടെ താരത്തിന്റെ ഡിമെറിറ്റ് പോയിന്റ് ആറായി ഉയര്‍ന്നതിനെ തുടര്‍ന്നാണ് ജഡേജയെ അടുത്ത ടെസ്റ്റില്‍ നിന്ന് സസ് പെന്‍ഡ് ചെയ്യാന്‍ മാച്ച് റഫറി തീരുമാനിച്ചത്. രണ്ടാം ടെസ്റ്റില്‍ ഇന്ത്യയെ വിജയിപ്പിക്കുന്നതില്‍ നിര്‍ണായക പങ്ക് വഹിക്കുകയും ഓള്‍റൗണ്ടര്‍മാരുടെ റാങ്കിങില്‍ ഒന്നാം സ്ഥാനത്തെുകയും ചെയ്ത ജഡേജയുടെ അഭാവം പരമ്പര തൂത്തുവാരനൊരുങ്ങുന്ന ഇന്ത്യക്ക് നേരിയ തിരിച്ചടിയാണ്. ഈ മാസം 12 മുതല്‍ 16 വരെയാണ് പരമ്പരയിലെ മൂന്നാം ടെസ്റ്റ് അരങ്ങേറുന്നത്.